Xitay hökümiti axbarat yighini ötküzüp “5-‍Iyul qirghinchiliqi” ni aqlidi

Muxbirimiz erkin
2021.07.06

Chet eldiki ‍uyghurlar keng kölemlik naraziliq namayishi ötküzüp, “5-Iyul ürümchi qirghinchiliqi” ning 12 yilliqini xatirligen bir waqitta, xitay hökümiti ‍özining bu weqeni qanliq basturghanliqini aqlighan. Uyghur aptonom rayonliq hökümet 5-iyul béyjngda axbarat yighini ötküzüp, “5-Iyul weqesi” ning “Dölet ichi-sirtidiki sherqiy türkistan küchlirining birliship uyushturghan éghir zorawanliq jinayi weqesi” ‍ikenliki, özlirining bu weqeni basturup, puqralarni qoghdighanliqini ilgiri sürgen.

“Xitay xewerliri” torining bildürüshiche, yighinda sayitjan sawur, jaw eychin isimlik atalmish shahitlar söz qilip, Uyghur namayishchilirining “Qattiq jazalinishi kérekliki” ni bildürgen. Biraq ular 7-iyul kaltek-toqmaq kötürüp, Uyghurlargha hujum qilghan xitay ashqunlirining qilmishini tilgha almighan. 5-Iyul küni Uyghurlar nurghun döletlerde namayish qilip, bu qirghinchiliqning 12 yilliqini xatirligen. Namayishchilar bu weqede mes'uliyiti bar kishilerni jawabkarliqqa tartishni, weqede ‍öltürülgen, ghayib bolghan, türmige tashlan'ghan Uyghurlarning iz-dérikini bérishni telep qilghan idi.

Lékin axbarat yighinida Uyghur aptonom rayonining bayanatchisi élijan inayet, “Shinjangning sotsiyalistik qanun bayriqini igiz kötürüp”, b d t ning alaqidar belgilimirining rohigha asasen “Térorluq” we “Ashqunluq” qa qattiq zerbe bergenliki, “Puqralarning tüp hoquqining tajawuzgha uchrimasliqigha eng zor derijide kapaletlik qilghanliqi” ni ilgiri sürgen. Xitay hökümiti bu weqede köp qismi xitaylar bolup 197 kishining ‍ölgenlikini qeyt qilsimu, biraq Uyghur teshkilatliri minglighan Uyghurning öltürülgen, tümige tashlan'ghan we ghayip bolghanliqini ilgiri sürüp kelmekte.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.