Xitay emdi rosiyede oquwatqan Uyghur oqughuchilarni sin ékrani arqiliq ata-aniliri bilen körüshـtürgen

Muxbirimiz irade
2021-07-08
Share

Xitayning rosiyede turushluq elchixanisi we atalmish "Shinjang-chet el dostluq jem'iyiti" birlikte bir sinliq yighin uyushturup, Uyghur élidin bérip rosiyede oquwatqan oqughuchilarni sin körünüshi arqiliq ata-aniliri bilen körüshtürgen.

"Xitay xewerler tori" din melum bolushiche, yighin'gha Uyghur aptonom rayonluq xelq hökümitining mu'awin re'isi jarulla hésamidin, xitayning rosiyede turushluq bash elchisi jang xenxuy we shundaqla rosiyede o'uwatqan oqughuchilar wekilliri bilen ularning ata-aniliri qatniship, sin arqiliq körüshken.

Xewerde mundaq déyilgen: "Yighinda rosiyede oquwatqan oqughuchilarning wekilliri aktipliq bilen söz qildi we özlirining xizmet, oqush we turmush shara'itini tonushturdi. Ularning shinjangdiki tughqanliri partiye we hökümetning xelqqe nep yetküzüsh siyasiti, yurtidiki xushallinarliq özgirishler we bextlik turmushini chet eldiki tughqanlirigha tonushturdi."

Sinliq yighinda bir qanche oqughuchining ata-aniliri bilen körüshtürülgen bolup, xewerde ularning ata-anilirining balilirigha "Biz hazir shundaq yaxshi yashawatimiz, eger siz chet elde oquyalighan bolsingiz, siz choqum partiye we dölettin minnetdar bolushingiz kérek, choqum japaliq öginishingiz we wetiningizge qaytip, wetiningizni we yurtingizni güllendürüshingiz kérek," dégenliki yézilghan.

Xitay hökümiti yéqinda türkiyede oquwatqan 20 neper Uyghur oqughuchighimu mushundaq bir yighin uyushturghan idi. Xitay hökümiti bu arqiliq chet ellerdiki Uyghurlarning yurtliridiki uruq-tuqqanliri bilen alaqe qilalmaywatqanliqidek shikayitini yalghan'gha chiqarmaqchi boluwatqan bolsimu, emma uning közligen meqsetke yételmeywatqanliqi melum.

Dunya Uyghur qurultiyining re'isi dolqun eysa bu heqtiki sözide "Hazirqidek uchurlashqan bir dewrde kim yéqinliri bilen alaqe qilish üchün elchixana we hökümet organliri bilen alaqilishidu? shexsi paranglarni sélish üchün yighin uyushturamdu? mushuning özi Uyghurlarning hoquqining qaysiy derijide depsende qiliniwatqanliqini namayen qilip béridu," dégen idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet