Da'irilerning kompartiye intizam teshwiqatini kücheytishi diqqet qozghidi
2016.08.09
Xitay taratqulirida Uyghur rayonluq hökümet we herqaysi yerlik hökümetlerning seperwerliki bilen yéqindin buyan barghanche küchiyiwatqan xitay kompartiyisi teshwiqati, weziyet analizchiliri, chet'ellerdiki Uyghur teshkilatliri we pa'aliyetchiliri teripidin “Shekilwazliq” dep tenqidlendi.
Xitayning shinjang xewerler torining 9-awghust seyshenbe künidiki xewiride shixu shehiride “Ikkini öginish, birni qilish” yeni “Kompartiye siyasiti, kompartiye étiqadida ching turush, intizamgha ri'aye qilish” kompartiye istili terbiye teshwiqati élip bérilip, shixu shehiridiki herqaysi partiye yachéykilirining obrazi yaxshiliniwatqanliqi xewer qilindi.
Xitayda bolupmu Uyghur, tibet qatarliq xitay bolmighan milletler rayonida yéqinqi yillardin buyan her xil namlar qoyulghan “Kompartiye obrazi teshwiqat pa'aliyetliri” élip bérilip, xitay kompartiyisining obrazini yaxshilashqa urunidighan weziyetning shekillinishi xelq'ara taratqularning diqqet nuqtisigha aylandi. Xitay weziyiti analizchiliri bu heqte toxtilip, shi jingping hökümiti parixorluq qilmishliri ashkarilan'ghan kompartiye emeldarliri köpeygenliki seweblik, barghanche étibardin qéliwatqan xitay kompartiyisining obrazini qayta tikleshke urunuwatqanliqini bildürgen bolsa, dunya Uyghur qurultiyi qatarliq Uyghur teshkilatliri we pa'aliyetchiliri xitay hökümet da'irilirining bu xil shekilwazliq teshwiqati arqiliq, xelq'araning Uyghurlargha qaritiliwatqan milliy we diniy basturush weziyitige bolghan diqqitini burap, Uyghurlarning xitay kompartiyisining adil siyasitide barawer yashawatqanliqini teshwiq qilishqa urunuwatqanliqini bildürmekte.