Xitayda ishlen'gen “Ortaq teqdir” namliq kinoning élan süriti diqqet qozghimaqta

Muxbirimiz sada
2019.08.28

Xitayda ishlen'gen we 30-awghust qoyulushi pilanlan'ghan “Ortaq teqdir” filimining élan süritide bir hijabliq ayalning orun élishi jem'iyette küchlük inkaslarni qozghighan.

Shinxu'a torining 28-awghusttiki munasiwetlik xewiride déyilishiche, “Ortaq teqdir” namliq bu filim xitay dölet ichidiki rézhissorlar qoshuni teripidin xitayning “Bir belwagh bir yol” pilanini chöridigen asasta ishlen'gen. Mezkur filimde bir uzun yolluq aptobusning yipek yolini boylap “Bir belwagh bir yol” qurulushigha tewe döletlerdin késip ötüshi hemde oxshimighan döletlerdiki oxshimighan menzire we perqliq hékayiler bayan qilin'ghan. Uningdin bashqa herxil millettiki kishilerning xizmet, turmush we arzuliri tonushturulup, “Bir belwagh bir yol” qurulushining dunyagha körsetken “Ijabiy” tesiri eks ettürülgen. Melum bolushiche, mezkur filim xitay kompartiyisi qurulghanliqining 70 yilliqigha atap mexsus ishlen'gen iken. 

Xewerdiki eng diqqetni tartidighan bir nuqta shuki, bir hijabliq ayalning mezkur filimning élan süritide orun élishidur. Xitay hökümiti yéqinqi bir qanche yildin buyan islam dinini “Ashqun idiye tarqatquchi din” dégen namda bu din'gha étiqad qilidighan milletlerni qattiq basturuwatqanliqi melum. Buning roshen ipadiliri bolsa yéqindin buyan ashkarilinip kelgen hijab artqan, namaz oqughan we kolléktip du'a-tilawet qilghan Uyghur, qazaq qatarliq yerlik musulman milletlerning jaza lagérlirigha solinip, ménge yuyulushqa uchrishidur. 

Derweqe, xitay da'iriliri özliri teshwiq qilip kéliwatqan “Diniy ashqunluqning ipadisi” bolghan hijabning xitay hökümiti üchün tarixiy ehmiyetke ige bolghan filimning élan süritide eks étishi chet'eldiki kishilik hoquq pa'aliyetchiliri arisidiki küchlük ghulghulilargha seweb bolmaqta.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.