Хитайда ишләнгән «ортақ тәқдир» намлиқ кинониң елан сүрити диққәт қозғимақта

Мухбиримиз сада
2019-08-28
Елхәт
Пикир
Share
Принт

Хитайда ишләнгән вә 30-авғуст қоюлуши пиланланған «ортақ тәқдир» филиминиң елан сүритидә бир һиҗаблиқ аялниң орун елиши җәмийәттә күчлүк инкасларни қозғиған.

Шинхуа ториниң 28-авғусттики мунасивәтлик хәвиридә дейилишичә, «ортақ тәқдир» намлиқ бу филим хитай дөләт ичидики режиссорлар қошуни тәрипидин хитайниң «бир бәлвағ бир йол» пиланини чөридигән асаста ишләнгән. Мәзкур филимдә бир узун йоллуқ аптобусниң йипәк йолини бойлап «бир бәлвағ бир йол» қурулушиға тәвә дөләтләрдин кесип өтүши һәмдә охшимиған дөләтләрдики охшимиған мәнзирә вә пәрқлиқ һекайиләр баян қилинған. Униңдин башқа һәрхил милләттики кишиләрниң хизмәт, турмуш вә арзулири тонуштурулуп, «бир бәлвағ бир йол» қурулушиниң дуняға көрсәткән «иҗабий» тәсири әкс әттүрүлгән. Мәлум болушичә, мәзкур филим хитай компартийиси қурулғанлиқиниң 70 йиллиқиға атап мәхсус ишләнгән икән. 

Хәвәрдики әң диққәтни тартидиған бир нуқта шуки, бир һиҗаблиқ аялниң мәзкур филимниң елан сүритидә орун елишидур. Хитай һөкүмити йеқинқи бир қанчә йилдин буян ислам динини «ашқун идийә тарқатқучи дин» дегән намда бу динға етиқад қилидиған милләтләрни қаттиқ бастуруватқанлиқи мәлум. Буниң рошән ипадилири болса йеқиндин буян ашкарилинип кәлгән һиҗаб артқан, намаз оқуған вә коллектип дуа-тилавәт қилған уйғур, қазақ қатарлиқ йәрлик мусулман милләтләрниң җаза лагерлириға солинип, меңә ююлушқа учришидур. 

Дәрвәқә, хитай даирилири өзлири тәшвиқ қилип келиватқан «диний ашқунлуқниң ипадиси» болған һиҗабниң хитай һөкүмити үчүн тарихий әһмийәткә игә болған филимниң елан сүритидә әкс етиши чәтәлдики кишилик һоқуқ паалийәтчилири арисидики күчлүк ғулғулиларға сәвәб болмақта.

Пикирләр (0)
Share
Толуқ бәт