Xitay "Jungxu'a milletliri ortaq gewdisi éngi" ni singdürüsh arqiliq özining assimilyatsiye pilanini ishqa ashurmaqta

Muxbirimiz jewlan
2020-10-07
Share

Xitayche "Tengritagh" tori 7-öktebir "Jungxu'a milletliri ortaq gewdisi éngini xelqning rohigha chongqur singdüreyli" namliq obzur élan qilghan bolup, xitayning dölet bayrimi munasiwiti bilen élan qilghan obzurliridin biri iken.

Bu obzurda xitaydiki tawuz chaghini jungxu'a milletlirining en'eniwi bayrimi déyilgen hemde turpan astanidin tépilghan yadikarliqlar tilgha élinip, "Tang dewridila bu yerdiki xelq ottura tüzlenglik hüniri boyiche yöbin (aytoqach) teyyarlashni bilgen" déyilgen.

Bu obzurda tawuz chaghini yétip kélish aldida Uyghur rayonining xoten qatarliq jaylirida yangaq yaki gülqent qétip yöbin teyyarlash, sétish, sowgha qilish pa'aliyetlirining janlinip ketkenliki bayan qilin'ghan hemde "Yöbin gerche kichik nerse bolsimu, u öz ichige alghan medeniyetning roligha sel qarashqa bolmaydu" déyilgen.

Uningda yene Uyghur rayonida korona wirusi yamrighan mezgilide her qaysi milletlerning qandaq ittipaqliship, bir-birige yardemliship késellik üstidin ghalib kelgenlik hékayiliri bayan qilin'ghan. Andin "Bular 'jungxu'a milletliri ortaq gewdisi éngi'ni janliq chüshendürüp béridu, bu ang döletning birlikke kélish asasidur, milletler ittipaqliqining tüp négizi we meniwi küchidur" déyilgen.

Analizchilarning bildürüshiche, xitayning bu xil teshwiqati yenila xitay sékritati shi jinpingning barliq milletlerni "Jungxu'a milletliri" dégen nam astida xitaylashturush siyasitining telipi bolup, shi jinping her qétimliq "Shinjang xizmiti yighini" da Uyghur kadirliri we Uyghur oqughuchilirining öz kimlikige a'it milliy, diniy we tarixiy köz qarishini tüptin yoqitip, ulargha "Jungxu'a milletliri ortaq gewdisi éngi" ni chongqur singdürüsh kéreklikini qayta-qayta tekitligen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet