Уйғур муқам ансамбили "хитай чүши" тәшвиқатиға ишлитилмәктә

Мухбиримиз әзиз
2021-11-17
Share

"хитай һөкүмитиниң уйғур дияридики мәдәнийәт қирғинчилиқи" дәп атиливатқан һадисиләрниң бири уйғур мәдәнийитиниң әң ярқин намайәндилириниң бири болған уйғур муқаминиң йоқилишқа қарап йүзлиниши болуп кәлгәниди. Йеқинда хитай даирилириниң уйғур муқам ансамбилиниң артислирини һәрқайси җайларда "җуңхуа ортақ кимлики" һәққидики тәшвиқат үчүн қорал қилип ишлитиватқанлиқи көпләп мәлум болмақта.

Хитай һөкүмити башқурушидики "тәңритағ" ториниң йеқиндики хәвиридә ейтилишичә, уйғур аптоном районлуқ муқам ансамбилиниң уйғур нахшичилардин түзүлгән "анарниң даниси" намидики оюн қоюш өмики лопнур наһийәсигә барған. Улар бу җайда "хитай чүши" темисидики тәшвиқат үчүн "җуңхуа ортақ кимлики" ни гәвдиләндүридиған бир қатар заманиви нахша вә драмиларни орундиған. Хәвәрдә гәрчә нахшичиларниң "ләрзан муқам күйлирини орунлиғанлиқи" ейтилған болсиму әмма нахшиларниң мавзуси уларниң пүтүнләй қоюқ сиясий пураққа игә "һазирқи заман хитайчә нахшилар" икәнликини көрсәткән. Хәвәрдиму алаһидә қилип бу қетимқи ‍оюн қоюшниң асаслиқ мәқсити "партийә тарихи" һәққидики билимләргә бирләштүргән һалда "җуңхуа ортақ кимлики" чүшәнчисини "һәрмилләт хәлқиниң йүрәк қетидин орун алдуруш" икәнлики тәкитлиниду.

Муқамлар вә 12 муқам уйғур хәлқиниң көп әсирлик музика мәдәнийитиниң символи болуп, буниң хитай миллий музикиси вә мәдәнийити билән һечқандақ мунасивити йоқлуқи, хитай компартийәси, һәтта манҗу-чиң сулалиси уйғурлар диярини ишғал қилиштин илгирики дәврләрдила уйғур муқамлириниң мәвҗутлуқи тарихчилар тәрипидин йәкүнләнгән һөкүмдур.

Мәлум болушичә, уйғур дияридики хитайлаштуруш һәрикити нөвәттә "җуңхуа ортақ кимликини етирап қилиш" дегән намда давам қиливатқан болуп, буниңда уйғурларға хас барлиқ миллий алаһидиликләр бир-бирләп йоқитилмақтикән. Буниңдин илгири болса бир қисим муқам күйлириниң хитайчә текист асасида хитайчә орундиливатқанлиқи мәлум болғаниди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт