Хитай һөкүмити хәлқарада уйғур елидики сиясәтлирини ақлаш тәшвиқатлирини давамлаштурмақта

Мухбиримиз ирадә
2019-11-21
Елхәт
Пикир
Share
Принт

» Хитай хәвәрләр тори «ниң 18-ноябир күни тарқатқан бир хәвиридин қариғанда, хитай даирилири йеқинда италийәниң рим шәһиридики «хитай оқуғучилар вә алимлар уюшмиси», «явропада җуңхуа мәдәнийитини тәшвиқ қилиш мунбири» қатарлиқ орунлири арқилиқ италийәдә «бир бәлвағ бир йол» қурулушини тәшвиқ қилиш паалийити қилған.

Диққәт қозғайдиғини, мәзкур паалийәттә «хитай оқуғучилар вә алимлар уюшмиси» ниң муавин уюшма башлиқи икәнлики илгири сүрүлгән әзимәт исимлик уйғур яш йиғин қатнашчилириға хитайда «ислаһат ечиветилгәндин буян уйғур елидә ғайәт зор өзгиришләр йүз берип, зор нәтиҗиләр қолға кәлтүрүлгәнлики» һәққидә доклат бәргән икән. Мәлум болушичә, паалийәттә йәнә уйғурчә уссул номурлириму көрситилгән икән.

«Тәңритағ тори» тәрипидин тарқитилған йәнә бир хәвәрдә болса или қазақ аптоном областиниң күнәс наһийәсидин болған җанар нурмухан исимлик бир нәпәр қазақ аялниң һекайисиму йорутулған. Мәлум болушичә, бу аял хитай һөкүмитиниң маашлиқ тәшвиқатчиси болуп, у хитайниң пиланлиқ туғут, «қошмақ туғқан» қатарлиқ түрлүк сиясәтлирини өйму-өй кирип чүшәндүридиған тәшвиқатчи икән. Хәвәрдә униң бу роһи үчүн хитай дөләтлик тәшвиқат идариси тәрипидин мукапатланғанлиқи мәдһийләнгән.

Хитай һөкүмитиниң уйғур елидә йолға қоюватқан зор көләмлик тутқун сиясити вә лагерлардики әмәлийәтниң чәтәлләрдә уйғур вә қазақ қатарлиқ шаһитлар тәрипидин кәң көләмдә ашкарилиниватқан бир пәйттә хитай һөкүмитиниң мушундақ образларни таллап туруп тәшвиқат материяли қилиши диққәт қозғайдикән. Нөвәттә хитай һөкүмити тәрипидин тәшкилләнгән «шинҗаң мәдәнийәт алмаштуруш өмики» намидики 6 кишилик бир өмәк қатар, бәһрәйин вә сәуди әрәбистанларда уйғур елидә йолға қоюватқан лагер сияситини ақлаш зиярәтлирини елип бериватқанлиқи мәлум.

Пикирләр (0)
Share
Толуқ бәт