Xitay hökümiti xelq'arada Uyghur élidiki siyasetlirini aqlash teshwiqatlirini dawamlashturmaqta

Muxbirimiz irade
2019-11-21
Élxet
Pikir
Share
Print

" xitay xewerler tori "Ning 18-noyabir küni tarqatqan bir xewiridin qarighanda, xitay da'iriliri yéqinda italiyening rim shehiridiki "Xitay oqughuchilar we alimlar uyushmisi", "Yawropada jungxu'a medeniyitini teshwiq qilish munbiri" qatarliq orunliri arqiliq italiyede "Bir belwagh bir yol" qurulushini teshwiq qilish pa'aliyiti qilghan.

Diqqet qozghaydighini, mezkur pa'aliyette "Xitay oqughuchilar we alimlar uyushmisi" ning mu'awin uyushma bashliqi ikenliki ilgiri sürülgen ezimet isimlik Uyghur yash yighin qatnashchilirigha xitayda "Islahat échiwétilgendin buyan Uyghur élide ghayet zor özgirishler yüz bérip, zor netijiler qolgha keltürülgenliki" heqqide doklat bergen iken. Melum bolushiche, pa'aliyette yene Uyghurche ussul nomurlirimu körsitilgen iken.

"Tengritagh tori" teripidin tarqitilghan yene bir xewerde bolsa ili qazaq aptonom oblastining künes nahiyesidin bolghan janar nurmuxan isimlik bir neper qazaq ayalning hékayisimu yorutulghan. Melum bolushiche, bu ayal xitay hökümitining ma'ashliq teshwiqatchisi bolup, u xitayning pilanliq tughut, "Qoshmaq tughqan" qatarliq türlük siyasetlirini öymu-öy kirip chüshendüridighan teshwiqatchi iken. Xewerde uning bu rohi üchün xitay döletlik teshwiqat idarisi teripidin mukapatlan'ghanliqi medhiylen'gen.

Xitay hökümitining Uyghur élide yolgha qoyuwatqan zor kölemlik tutqun siyasiti we lagérlardiki emeliyetning chet'ellerde Uyghur we qazaq qatarliq shahitlar teripidin keng kölemde ashkariliniwatqan bir peytte xitay hökümitining mushundaq obrazlarni tallap turup teshwiqat matériyali qilishi diqqet qozghaydiken. Nöwette xitay hökümiti teripidin teshkillen'gen "Shinjang medeniyet almashturush ömiki" namidiki 6 kishilik bir ömek qatar, behreyin we se'udi erebistanlarda Uyghur élide yolgha qoyuwatqan lagér siyasitini aqlash ziyaretlirini élip bériwatqanliqi melum.

Toluq bet