Xitay hökümiti Uyghurlarning yurt-makanliridin köchürülüshini “Yézilarni güllendürüsh” dep aqlighan

Muxbirimiz erkin
2021-11-22
Share

Uyghur aptonom rayonluq hökümet 21-noyabir axbarat yighini chaqirip, 2017-yildin bashlap téximu keng kölemlik yolgha qoyulghan Uyghur déhqanlirini yéngi turalghu nuqtilirigha köchürüsh qurulushini aqlighan. Da'irilerning ilgiri sürüshiche, bu köchürüsh herkiti “Yézilarni gullendürüsh” qurulushi iken.

Xitay hökümiti 2017-yili bashlan'ghan chong tutqun bilen bir waqitta, xuddi qepezdek qorshalghan olturaq rayonlarni keng kölemde qurup, yéza-kent we qishlaqlardiki bagh-waranliq qora-jaylirida yashaydighan Uyghur déhqanlirini bu rayonlargha köchürgen.

Kishilik hoquq teshkilatlirining éytishiche, da'iriler bu yéngi olturaq rayonlirining etrapigha yene xitay karxanilirini qurup, Uyghur déhqanlirini bu karxanilardiki mejburiy emgek küchlirige aylandurghan. Biraq axbarat yighinida Uyghur aptonom rayonluq déhqanchiliq nazaritining mu'awin naziri shü taw bu qurulushni maxtap: “Shinjangning déhqanchiliq we yéza tereqqiyatini aldinqi orun'gha qoyup, yéza-kentlerni güllendürüsh istiratégiyesini keng kölemlik ijra qilghanliqi, yéza-kentlerning ishlepchiqirishi, ixtisas ‍igiliri, medeniyet, ékologiye we teshkiliy janlinishini algha sürüshi arqisida zor tereqqiytatqa érishkenliki” ni bildürgen.

Axbarat yighini Uyghur élida tok, gaz, kömür we bashqa yéqulghularning bahasi shiddetlik örlep kétishi tüpeyli atalmish bu xil “Zamaniwi olturaq öyler” ge köchürüp kélin'gen Uyghur déhqanlirining tok we issiqliq pulini töleshke amalsiz qélip, éghir ehwalda qalghanliqi qeyt qiliniwatqan bir waqitta ötküzülgen. Közetküchilerning éytishiche, bu qurulushning meqsiti Uyghur déhqanlirini mejburiy emgek küchlirige aylandurupla qalmay, ularning bu olturaq rayonlirida téximu ‍ünümlük kontrol qilish iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet