Хитайниң осакадики баш консулханиси “һәқиқий шинҗаңни көрситиш” намлиқ тәшвиқат йиғини ачқан

Мухбиримиз ирадә
2021-12-16
Share

“хитай хәвәрләр тори” ниң хәвиригә қариғанда, хитайниң осакадики баш консулханиси 15-декабир күни уйғур елиға мунасивәтлик бир тор тәшвиқат йиғини уюштурған. Бу йиғинда “ляңзәй сизгә һәқиқий шинҗаңни көрситиду” намлиқ картон йүрүшлүк филими вә башқа филимләрни көрситиш арқилиқ, хитайниң аталмиш “шинҗаңдики һәқиқәтләр ғәрб таратқулирида дейилгәнләрдин пәрқлиқ” дегән сахта тәшвиқати базарға селинған.

Хитай һөкүмитиниң уйғурларға ирқий қирғинчилиқ вә мәҗбурий әмгәк йүргүзүватқанлиқи, японийә ахбаратлирида кәң орун алған вә японийәниң йеңи һөкүмәт әзалириму көп қетим уйғурлар мәсилисдә соалларға дуч кәлгән иди. Униң үстигә японийәниң бейҗиң қишлиқ олимпикигә қатнишиш яки қатнашмаслиқ мәсилисидә қандақ позитсийә билдүридиғанлиқи қизиқиш қозғаватқан бир пәйттә, осакадики хитай консулханисиниң бу тәшвиқат паалийитини уюштуруши диққәт қозғиди.

Син йиғинида уйғур елиниң гүзәл мәнзирилири, нахша-усуллири намайән қилинип, уйғурларниң уссул ойнап, нахша ейтип, хошал-хорам яшаватқанлиқидәк филимләр көрситилгән. Осакадики хитай баш консули шө җйән сөз қилип: “бу бир түркүм картон филимлар японлуқ достларниң шинҗаңни обйектип тонуши, һәқиқий қияпитини чүшиниши вә шинҗаң хәлқиниң һәқиқий авазини аңлаштики кичик бир қәдәм болуп қалиду,” дегән.

Хитай һөкүмити илгириму көплигән дөләтләрдә мушу хилдики паалийәтләрни уюштуруп, өзлириниң уйғурларға қарита “ирқий қирғинчилиқ” қилғанлиқи яки “инсанийәткә қарши җинайәт” өтـкүзгәнликини инкар қилған иди. Әмма хитайниң шунчә зор мәбләғ вә адәм күчи сәрп қилип, ахбарат вә пикир әркинлики мәвҗут демократик дөләтләрдә бу хил сахта тәшвиқатларни елип бериши, һечқанчә үнүм көрситәлмигән иди.

Бу нөвәт осакадики хитай консулханиси уюштурған бу тәшвиқат паалийитигә уйғур елида туғулуп өскәнлики вә чәт әлләрдә муһаҗир болуп яшаватқанлиқи илгири сүрүлгән җәмилә исимлик бир уйғурму қатнаштурулған вә сөзлитилгән. Чәт әлләрдики уйғурлар, хитай һөкүмитиниң бундақ тәшвиқат һәрикәтлириниң уларниң җинайитини испатлайдиған полаттәк пакитлар алдида өзини алдаштин башқа ишқа яримайдиғанлиқини тәкәтләшмәктә.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт