Amérika xitayning xelq'ara hawa yolliri shirketlirige bésim ishletkenlikini "Orwélche biljirlash" dédi

Muxbirimiz erkin
2018-05-07
Élxet
Pikir
Share
Print

Xitayning yéqinda 36 xelq'ara hawa yoli shirkitige xet yézip, ularning siyasiy mesililerde xitayning resmiy siyasiy meydanigha emel qilishini telep qilishi aq sarayning keskin ret qilishigha uchridi.

Aq saray 5‏-aprél bayanat élan qilip, xitayning telipini "Orwélche biljirlash" dep tekitlidi. Jorji orwél ataqliq en'gliye yazghuchisi bolup, u "1984‏" namliq esiride atlantik okyandiki bir ghayiwi istibdat döletning mutleq hökümranliqini teswirleydu. Shuningdin béri orwélning ismi hakimmutleq istibdat döletlerni teswirleydighan bir xelq'ara nam bolup qalghan idi.

Aq sarayning bayanatida, xitayning amérika hawa yoli shirketlirige tehdit sélishni toxtitishi telep qilin'ghan. Aq sarayning axbarat sékrétari sara xukabi sandérs, "Amérika prézidénti donald tramp xitay kompartiyesining xitayche siyasiy jehettiki toghriliqini amérika shirketliri we grazhdanlirigha mejburlishigha qarshi tik turidighanliqini bildürdi" dégen.

Xelq'ara axbarat wasitilirining ashkarilishiche, bu yil 4‏-ayda xitayning xelq awi'atsiye idarisi amérikining birleshme hawa yoli, amérika hawa yoli qatarliq dunyadiki 36 xelq'ara hawa yoli shirkitige xet yézip, ularning teywen, xongkong, awmén(makaw) mesililiride xitayning siyasiy meydanigha emel qilishini telep qilghan.

Aq sarayning bayanati düshenbe küni amérikining béyjingdiki elchixanisining torida élan qilin'ghan. Amérika elchixanisi yene amérika dölet ishlar ministirliqi bayanatchisi hézir né'urtning Uyghur zhurnalistlar heqqidiki bayanatini élan qilghan. Hézir né'urt 3‏- may dunya axbarat erkinliki küni bayanat élan qilip, xitay hökümiti Uyghur zhurnalistlirining Uyghur rayonidiki basturushini xewer qilghanliqi seweblik ularning a'ile ezalirini tutqun qilghanliqini bildürgen idi. Aq saray we dölet ishlar ministirliqining bayanati xitay ijtima'iy taratqulirida amérikigha qarshi munazire qozghighan.

Birleshme agéntliqining xewer qilishiche, xitay tashqi ishlar ministirliqi düshenbe küni aq sarayning bayanatini ret qilip, "Amérika néme dése désun dunyada birla xitay barliqidek bu pakitni özgertelmeydu" dégen.

Toluq bet