Хитай, б д т ниң роһинга мәсилисидики қарариға йәнә тосалғулуқ қилған

Мухбиримиз шөһрәт һошур
2018-05-09
Елхәт
Пикир
Share
Принт

Ройтерсниң хәвәр қилишичә, б д т бихәтәрлик кеңишидә әнглийә тәрипидин тәйярланған роһинга мәсилиси тоғрисидики баянат лайиһәси хитай вәкили тәрипидин қисмән өзгәртиветилгән.

Хәвәрдә дейилишичә, әсли лайиһидики бирма һөкүмитини «җавабкарларни җазаға тартиш һәққидики вәдисини дәрһал әмәлийләштүрүштә чақириш» тоғрисидики мәзмун, «бирманиң роһинга вәзийитини яхшилаш үчүн көрситиватқан тиришчанлиқини қарши елиш» қа өзгәртиветилгән. Мәлум болушичә, бу, хитайниң роһинга мәсилисидики җавабкарлиқниң сүрүштә қилинишиға тунҗи қетим тосалғу болуши әмәс.

Охшаш әһвал өткән йили йүз бәргәндә йәни хитай ташқи ишлар министири ваң йи бирма һөкүмитиниң роһингадики һәрикитини тоғра чүшинидиғанлиқини билдүргәндә, дуня уйғур қурултийиниң алий рәһбири рабийә қадир ханим мәхсус баянат елан қилип, хитайниң роһинга мәсилисидә ғәрб дуняси билән қарши мәйданда турушиниң сәвәбини уйғур вәзийитигә бағлап чүшәндүргән иди.

Баянатида бирмида нәччә йүз миң роһингалиқ мусулман зулумдин юртини ташлап қечишқа мәҗбур болған болса, уйғур районида бир милйончә уйғурниң «йепиқ лагер» да зулум чекиватқанлиқини әскәрткән рабийә ханим, хитай тәрәпниң хәлқара сәһнидә сорақ нөвитини өзигә йеқинлаштурмаслиқ үчүн бирма һөкүмитини қоллаватқанлиқини оттуриға қойған иди.

Ройтерсниң бүгүнки бу һәқтики хәвиридә дейилишичә, хитайниң бу қетимқи тосалғуси, б д т вәкили өткән һәптә бирма вә бенгалда елип барған тәкшүрүш нәтиҗисигә асасән бихәтәрлик кеңишидә бир баянат лайиһисини музакирә қиливатқан мәзгилдә көрүлгән.

Йәнә хәлқара хәвәрләрдин мәлум болушичә, ислам дөләтлири һәмкарлиқ тәшкилати йәкшәнбә күни бир баянат елан қилип бирминиң роһинга мусулманлириға қарита елип барған бастуруш һәрикәтлирини етник қирғинчилиқ дәп әйиблигән. Муһаҗирәттики уйғур паалийәтчилири йеқинқи намайишлири давамида ислам дунясиниң уйғур районидики лагерлар мәсилисидә сүкүт қилип туруватқанлиқиға қарита наразилиқлирини билдүрүшкән иди.

Пикирләр (0)
Share
Толуқ бәт