“14 - Mart lasa weqesi” de xitay qoralliq qisimliri 101 tibetni étiwetken

Radi'omizning xewer qilishiche, daramsaladiki tibette kishilik hoquq we démokratiyeni ilgiri sürüsh jem'iyiti charshenbe küni ashkarilighan bir mexpiy höjjetke qarighanda 2008 - yilidiki “14 - Mart lasa weqesi” de xitay qoralliq qisimliri étiwetken tibet namayishchining sani eng az dégendimu 101 din ashidiken.

Mezkur sanliq melumat lasa j x idarisi qanun ijra qilish bölümining téxnikiliq bahalash xulasisi we ölgenler üstidin turghuzulghan mexpiy tizimliktin élin'ghan.

Tibette kishilik hoquq we démokratiyeni ilgiri sürüsh jem'iyitining tetqiqatchisi sirinjyéning radi'omizgha bildürüshiche, lasa depine idarisi turghuzghan yene bir tizimlikte öltürülgen 26 neper tibetlikning ismi bar iken. Buningda bir erge 17 pay, yene ikki ayalgha ayrim - ayrim halda 15 pay we 8 pay oq tegken iken.

U: shunisi éniqki da'iriler eyni chaghda namayishni bésiqturush üchün pilimot ishletken, dédi.

U yene, eyni yili xitay bayanchisi chinggangning xitay qoralliq qisimlirining özini qattiq tutuwalghanliqi we héchqandaq adem olturidighan qoral ishletmigenlikini éytqanliqini eslep: bu mexpiy höjjetning ashkarilinishi xitay hökümitining tolimu yalghanchi ikenlikini ispatlaydu, dédi.

Xitay axbaratliri eyni yili peqet tibet namayishchilarning xitay puqralirigha hujum qilghanliqi, xitaylar igidarchiliqidiki dukan - saraylarni urup - chaqqanliqinila xewer qilghan idi.