Xitay korla bilen chingxeyning golmud shehiri arisidiki tömür yol qurulushini bashlidi

Muxbirimiz ümidwar
2017-06-04
Élxet
Pikir
Share
Print

Xitay özining "Bir belwagh bir yol" istratégiyesini öz ichige we etraptiki döletlerge küchep teshwiq qiliwatqan shuningdek hem uni emeliyleshtürüshke heriket qiliwatqanda xitay tömür yol qurulush da'iriliri Uyghur diyari bilen xitay ölkilirini tutashturidighan üchinchi tömür yol liniyisi qurulushini bashlidi.

Ashkarilinishiche, Uyghur diyarining ottura qismigha jaylashqan korla shehiridin biwasite chingxey ölkisining golmud shehirini tutashturidighan tömür yol qurulushida rélis yatquzush bashlan'ghan.

Mezkur liniyening omumi musapisi 1213 kilométir bolup, asasliqi korla shehiridin bashlinip, tarim oymanliqi yönilishi boyiche, lopnur, tikenlik, chaqiliq, we miran qatarliq jaylarni bésip ötüp, eng axirida chingxey ölkisidiki golmud shehirige tutishidiken. Mezkur tömür yolni xitay qatnash da'iriliri ürümchi bilen lenju arisidiki asasiy liniyedin kéyinki Uyghur diyari bilen ichkiri ölkilerni tutashturidighan muhim jenubiy yol dep atighan.

Mezkur tömür yol liniyisi arqiliq Uyghur diyarining jenubi qismi, Uyghurlar zich olturaqlashqan tarim wadisi etrapi xitayning ottura tüzlenglik we déngiz yaqiliri bilen biwasite tutishidighan bolup, bir Uyghur siyasiy analizchining éytishiche, mezkur yéngi tömür yol liniyisi bir tereptin xitayning qeshqer -pakistan iqtisadi karidori arqiliq hindi okyan boyliri bilen soda-iqtisadiy alaqisini kücheytish rolini oynisa, yene bir tereptin xitayning tarim oymanliqi etrapida Uyghurlar nopus jehette mutleq köp sanliqni égilish weziyitini özgertishide, yeni, téximu köp xitay köchmen ahalisining tarim wadisining jenubi rayonlirigha orunlishishini ishqa ashurushida muhim rol oynaydiken.

Tengritagh toridiki bu heqtiki xewerdin ashkarilinishiche, bu qurulush üchün 36.5 Milyard yüen meblegh ajritilghan bolup, mezkur yolni téz püttürüsh we 2020-yili qatnash bashlash pilan qilin'ghan.

Toluq bet