Dunya Uyghur qurultiyi: "Xitayning türmilerni keng kölemlik kéngeytishi Uyghur tutqunlar bilen munasiwetlik"

Muxbirimiz ümidwar
2019-03-27
Élxet
Pikir
Share
Print

Xitay hökümitining ichkiri ölkilerdiki türmilerni keng kölemlik kéngeytiwatqanliqining Uyghur tutqunlar bilen munasiwetlik ikenliki ilgiri sürüldi. Yéqinda, xitay hökümitining 2017‏-yili bashlan'ghan Uyghurlarni keng kölemlik tutqun qilish herikitide tutqun qilin'ghan bir qisim Uyghurlarning ichkiri ölkilerdiki türmilerge yötkigenliki ashkarilan'ghan idi. Radiyomiz xitay bölümining igilishiche, xitay hökümiti 2018‏-yildin bashlap ichkiri ölkilerdiki bezi türmilerni keng kölemlik kéngeytip qurghan. Xewerde, hazirgha qeder 34 türmining kéngeytip qurulghanliqi, lékin bu kéngeytip qurulghan türmilerning hemmisini öz ichige almaydighanliqini bildürgen. Kéngeytip qurulghan bu türmiler xunendiki shawyang türmisi, yongju türmisi, guyjudiki shingyi türmisi, xénendiki loyang we xéylongjyangdiki xarbin türmilirini öz ichige alidiken. Shu munasiwet bilen radiyomiz xitay bölümining muxbiri yongju türmisige téléfon qilip, Uyghur we qazaq tutqunlirining xunendiki türmilerge yötkep kélin'genlikini sorighan bolsimu, lékin türme xadimi "Méning türmidin ayrilghinimgha bir qanche ay boldi, bu ish manga éniq emes" jawab bergen.

Dunya Uyghur qurultiyi bayanatchisi dilshat rishitning bildürüshiche, türmilerning keng kéngeytilishi Uyghur tutqunlar bilen munasiwetlik iken. U 26-mart küni xitay bölümining muxbirigha, "Xitay hökümitining Uyghur we bashqa türki milletlerni zor türkümlep qayta-terbiyelesh lagérlirigha qanunsiz qamighachqa bu orunlar adem bilen toshup ketti. Shuningdek yene xelq'ara jem'iyetning qattiq bésimigha uchrimaqta. Shunga, u tutqunlarni pilanliq türde ichkiri ölkilerge yötkimekte" dégen. Yéqinda radiyomiz Uyghur tutqunlirining xéylongjyang, ichki mongghul, shenshi, gensu qatarliq ölkilerdiki türmilerge yötkep apirilghanliqini delilligen idi.

Toluq bet