Хитай үрүмчидә асия - явропа көргәзмиси өткүзиду

Мухбиримиз үмидвар
2016-09-11
Елхәт
Пикир
Share
Принт


Уйғур райони даирилири үрүмчи шәһиридә 5 - қетимлиқ хитай - асия - явропа көргәзмиси өткүзидиғанлиқини елан қилған болуп, мәзкур хәлқаралиқ паалийәт 9 - айниң 20 - күнидин 25 - күнигичә елип берилидикән. Мәзкур көргәзминиң тәркиби қисми сүпитидә йәнә «2 - қетимлиқ хитай - асия - явропа нәшрият көргәзмиси» вә «3 - қетимлиқ асия - явропа кино көргәзмиси» өткүзилидикән.

«Шинҗаң гезити»ниң хәвәр қилишичә, бу қетимлиқ нәшрият буюмлири көргәзмисигә 17 дөләт қатнишидиған болуп, бу көргәзмә үчүн уйғур аптоном районлуқ көргәзмә мәркизиниң кәң бир қисим орни аҗритилған.

Даириләр мәзкур нәшрият вә кино көргәзмилири арқилиқ уйғур райониниң «өзгичилики вә ислаһат һәм ечиветиштә иттипақлиқ ичидә илгириләватқан дәвр қияпитини толуқ ипадиләйдиғанлиқи»ни билдүргән.

Әмма, игилинишичә, бу қетимму худди илигирикидәк көргәзмә мәзгилидики бихәтәрлик ишлириға алаһидә әһмийәт берилгән.

«яшин» ториниң хәвәр қилишичә, үрүмчи шәһәрлик җамаәт хәвпсизлик идариси «хитай - асия - явропа көргәзмиси» мәзгилидики қатнаш бихәтәрлики вә қатнашниң раванлиқи үчүн 19 - сентәбирдин 25 - сентәбиргичә шәһәр ичидики бир қисим муһим йолларда күндузи сиртниң узун йоллуқ қатнаш аптобуслиридин башқа хусусий аптомобилларниң йүрүшини бирдәк чәкләнгәнликини уқтурған.

Һәр қайси өлкә, вилайәт, област вә шәһәрләрниң партийә, һөкүмәт органлириниң үрүмчидә иш беҗириштә ишлитидиған аптомобиллири үчүн үрүмчи шәһәрлик җамаәт хәвпсизлик идариси қатнаш сақчи тармиқиниң тамғиси бесилған йүрүш кинишкиси беҗириш тәләп қилинған. Әмма, сирттин киридиған шәхсий аптомобилларға бирдәк кинишка беҗирип берилмәйдикән.

Пикирләр (0)
Share
Толуқ бәт