Xitay ürümchide asiya - yawropa körgezmisi ötküzidu

Muxbirimiz ümidwar
2016-09-11
Élxet
Pikir
Share
Print


Uyghur rayoni da'iriliri ürümchi shehiride 5 - qétimliq xitay - asiya - yawropa körgezmisi ötküzidighanliqini élan qilghan bolup, mezkur xelq'araliq pa'aliyet 9 - ayning 20 - künidin 25 - künigiche élip bérilidiken. Mezkur körgezmining terkibi qismi süpitide yene "2 - Qétimliq xitay - asiya - yawropa neshriyat körgezmisi" we "3 - Qétimliq asiya - yawropa kino körgezmisi" ötküzilidiken.

"Shinjang géziti"ning xewer qilishiche, bu qétimliq neshriyat buyumliri körgezmisige 17 dölet qatnishidighan bolup, bu körgezme üchün Uyghur aptonom rayonluq körgezme merkizining keng bir qisim orni ajritilghan.

Da'iriler mezkur neshriyat we kino körgezmiliri arqiliq Uyghur rayonining "Özgichiliki we islahat hem échiwétishte ittipaqliq ichide ilgirilewatqan dewr qiyapitini toluq ipadileydighanliqi"ni bildürgen.

Emma, igilinishiche, bu qétimmu xuddi iligirikidek körgezme mezgilidiki bixeterlik ishlirigha alahide ehmiyet bérilgen.

"Yashin" torining xewer qilishiche, ürümchi sheherlik jama'et xewpsizlik idarisi "Xitay - asiya - yawropa körgezmisi" mezgilidiki qatnash bixeterliki we qatnashning rawanliqi üchün 19 - séntebirdin 25 - séntebirgiche sheher ichidiki bir qisim muhim yollarda künduzi sirtning uzun yolluq qatnash aptobusliridin bashqa xususiy aptomobillarning yürüshini birdek cheklen'genlikini uqturghan.

Her qaysi ölke, wilayet, oblast we sheherlerning partiye, hökümet organlirining ürümchide ish béjirishte ishlitidighan aptomobilliri üchün ürümchi sheherlik jama'et xewpsizlik idarisi qatnash saqchi tarmiqining tamghisi bésilghan yürüsh kinishkisi béjirish telep qilin'ghan. Emma, sirttin kiridighan shexsiy aptomobillargha birdek kinishka béjirip bérilmeydiken.

Toluq bet