Shi jinping xitay armiyesining barliq küchini urushqa merkeshleshtürüshini telep qilghan

Muxbirimiz erkin
2022.11.08

Yéqinda 3-qétim xitay kompartiyesining bash sékritarliq ornigha chiqip, özining kompartiye ichidiki mutleq hökümranliqini mustehkemligen shi jinping, 8-noyabir küni xitay merkizi herbiy ishlar komitéti birleshme urush qilish qomandanliq shtabini ziyaret qilip, xitay qoralliq qisimlirining barliq küchini urushqa merkezleshtürüshini telep qilghan.

Xitay hökümet taratquliri shi jinpingning xitay armiyesidin barliq küchini urushqa merkeshleshtürüshni telep qilishta kimni nishan qilghanliqini tilgha almighan bolsimu, lékin xitayning gherbiy tinch okyan rayonida amérika we uning ittipaqdashlirigha xiris qiliwatqanliqi hemmige melum.

Buning aldida amérika istératégiyelik qomandanliq shtabining qomandani, adméral charlés richard, amérika bilen xitay otturisida chong toqunush yüz bérishke yéqinliship qéliwtqanliqini bildürgen idi. U, ötken charshenbe küni, yeni 2-noyabir ötküzülgen bir qétimliq yighinda, ukra'inadiki urushning amérika hazir duch kelgen eng chong toqunush emesliki, uning choqum xitaygha chétishliq dunyawi toqunushqa teyyarliq qilishi kéreklikini éytqan idi. Uning arqisidinla shi jinping xitay merkizi herbiy ishlar komitéti birleshme urush qilish qomandanliq shtabini közdin kechürüp, xitay armiyesining barliq küchini urushqa merkeshleshtürüshini telep qilghan.

Shinxu'a agéntliqining xewer qilishiche, shi jinping birleshme urush qilish qomandanliq shtabini közdin kechürgende mundaq dégen: “Pütün armiye partiyening yéngi dewrdiki armiyeni kücheytish idiyesi, yéngi dewrdiki herbiy istiratégiye yönilishini emeliyleshtürüshi, jeng qilish küchidin ibaret bu tüp ölchemde ching turup, barliq küchini urushqa merkezleshtürüshi, barliq xizmetler urushqa qaritilishi, ghelibe qilish iqtidarini yuqiri kötürüshni tézlitishi kérek.”

Shi jinpingning bu yolyoruqni, amérika dölet mudapiye ministirliqining yéqinda élan qilghan yéngi dölet mudapiye istiratégiyeside xitay amérika bixeterliki üchün eng chong tehdit, dep körsitilishining arqisidinla bergen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.