Hindistanliq mutexessis: "Xitay üchün xataliqlirini tonush téxi kéchikmidi, Uyghurlar bilen eplishishi kérek"

Muxbirimiz shöhret hoshur
2018-08-08
Élxet
Pikir
Share
Print

Hindistanliq mutexessis méhir sharma tünügün, yeni 7‏-awghust küni "Blumbérg géziti" da élan qilghan maqaliside xitayning Uyghur mesiliside, bolupmu lagérlar mesiliside xatalashqanliqini, emma bu xataliqini tüzitimen dése pursetning téxi qoldin ketmigenlikini ilgiri sürgen.

Xitayning Uyghur aptonom rayonini özining "Bir yol bir belwagh" pilani üchün bir öteng ornida körüwatqanliqi, bu yerdiki yerlik xelqning rolini chetke qéqiwatqanliqi ilgiri sürülgen bu maqalida "Tijaret démek bir qanche yük mashinisini tamozhnigha ekélip tekshürüshtin ötküzüsh dégenlik emestur" déyilgen. Nöwette Uyghurlarning yighiwélish lagérlirigha dawamliq soliwéliniwatqanliqi we bazarlarning quruqdilip qalghanliqi eskertilgen bu maqalida xitayning yighiwélish lagérliri arqiliq Uyghurlarni özlirige qarshi küshkürtüpla qalmastin, belki yene "Bir yol bir belwagh" pilanighimu xewp shekillendürgenliki eskertilgen. 

Maqalida déyilishiche, xitay Uyghurlarni "Bir yol bir belwagh" pilanidiki sodidin tamamen siqip chiqarmaqchi we uning ornini xitay köchmenliri bilen toldurmaqchiken. Emma bu kargha kelgen we kélidighan bir tedbir emes iken. Maqalida yene mundaq déyilgen: "Bu gepler qulaqqa xosh yaqmasliqi mumkin, emma xitay terep xataliqini tonushta téxi kéchikmidi, xitay shinjangdiki Uyghurlar bilen eplishishi kérek." 

Maqalida yene Uyghurlarning yalghuz emesliki, til we medeniyet jehettin ottura asiya xelqlirining bir parchisi ikenliki, shunga Uyghurlargha qilin'ghan heqsizliqning xitayning ottura asiyadiki qoshniliri bilen bolghan munasiwitige axirqi hésabta selbiy tesir körsitidighanliqi eskertilgen we sayragül sa'utbay weqesi eslitilgen.

Toluq bet