Xitay waksinisi emligenler hejige baralmaydiken

Muxbirimiz irade
2021-05-27
Share

Ötken yili tajisiman wirus yuqumi sewebidin cheklik sandiki hajilarni qobul qilghan se'udi erebistani yéqinda bu yilliq hej normisi we uninggha munasiwetlik shertler heqqide bir uqturush élan qilghan. Se'udi da'irilirining höjjitide bu yil dölet ichi we sirtidin 60 ming haji namzatini qobul qilidighanliqini, biraq bu haji namzatlirining se'udi erebistan'gha kirishi üchün uqturushta ismi tilgha élin'ghan waksinilarni emligen bolushi kéreklikini bildürgen.

"Express Tribune" ning xewirige qarighanda, se'udi erebistanning bu tizimlikige fayzér, oksford, modérna, jonson we jonsonning waksiniliri kirgen bolsimu, biraq xitayning sinowak shérkiti ishlepchiqarghan waksina kirgüzülmigen.

Melum bolushiche, bundin ilgiri se'udi erebistan xitay waksinisini emligen pakistanliq haji namzatlirini döletke kirgüzmigenliktin qalaymiqanchiliq peyda bolghan iken we se'udi da'iriliri bu uqturushni élan qilghan iken.

Türkiyediki "Xewer türk" qatarliq axbarat wastilirining xewiridin qarighanda, se'udi da'irilirining bu uqturushi xitay ishlepchiqarghan sinowak waksinisini asas qilip qilip emligen türkiye, hindonoziye we pakistan qatarliq dötlerdiki haji namzatlirini endishige salghan.

Türkiye bu yil 1-ayda qobul qilghan 50 ming xitay waksinisi tunji qétim 60 yashtin ashqanlargha emligen bolup, hejige iltimas qilghuchilarning köpinchisi 60 yashtin ashqanlar iken. Shunga eger se'udiy erebistanining uqturushi özgermise, türk haji namzatliri bu yilmu hejige baralmaydiken.

Melum bolushiche, pakistan tashqiy ishlar ministirliqi bu qarargha étiraz bildüridighanliqini we se'udi hökümitidin xitay waksinisi tizimlikke kirgüzüshni telep qilidighanliqini éytqan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet