Хитайниң муһим санаәт базиси болған чаңчүн шәһири юқум сәвәбидин қамал қилинған

Мухбиримиз әркин
2022.03.14
Share on WhatsApp
Share on WhatsApp

Корона вируси юқуминиң қайта партлиши сәвәбидин хитай һөкүмити 11-марттин башлап, хитайниң муһим санаәт базилириниң бири болған чаңчүн шәһирини қамал қилған, шундақла хитайниң пул-муамилә вә сода мәркизи болған шаңхәй шәһиридә мәктәпләрни тақиған. Шенҗен шәһри һалқилиқ аммиви мулазимәт орунлиридин башқа барлиқ орунларниң ишләпчиқиришини тохтатқан яки пуқраларни ‍өйидә ишләшкә буйруған. Мәлум болушичә, даириләр хитайда 11-март күни корона вируси юқуминиң тарқилиши йеқинқи икки йилдин буянқи әң юқури чәккә йәткәндин кейин алақзадиликкә чүшүп, юқириқи тәдбирләрни елишқа башлиған икән.

Франсийә агентлиқиниң хәвәр қилишичә, җилин ‍өлкисиниң мәркизи болған 9 милйон нупуслиқ чаңчүн шәһиридә пуқраларниң сиртқа чиқиши чәкләнгән, пәқәт һәр бир аилидин бир кишиниң икки күндә бир қетим сирттқа чиқип, “күндилик турмуш буюмлири” ни сетивелишиға йол қоюлған.

Мәзкур шәһәрдә йәнә аммиви қатнас вастилири тохтитилған, мәктәп вә сода орунлири тақалған, пуқраларға кәң көләмлик әмләш елип берилишқа башлиған. Мәлум болушичә, 2020-йилиниң башлири хитайниң вухән шәһиридә корона вируси тарқилишқа башлиған дәсләпки мәзгилдин буян, өткән җүмә күни, йәни 11-март күни тунҗи қетим хитайда юқумдарларниң сани 1000 дин ешип, рәсми юқумдарлар 1369 ға йетип барған.

Корона вируси юқуми 2019-йилниң ахирлири хитайниң вухән шәһиридә байқалған болсиму, лекин хитай һөкүмити юқумни бир мәзгил йошурған, шундақла юқумдарларниң санини азайтип елан қилип, юқум байқалған районларни қамал қилиш, кәң көләмлик әмләш елип бериш, чеграни тақаштәк вастиларни ишлитип кәлгән иди. Хитай даирилири ‍өткән йили 10-айда уйғур дияриниң қозғас наһийәсидә қайта юқум байқалғандиму, пүтүн или тәвәсини бир айдин артуқ қамал қилип, мәзкур районниң сирт билән болған алақисини үзүп ташлиған иди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.