Marko rubi'o: ""Xitay korona wirusining sanliq uchurini yoshurup, uning tarqilishigha yol qoydi"

Muxbirimiz erkin
2020-03-23
Share

Amérika dölet mejlisi xitay ishlar komitétining qosh re'isi, kéngesh palata ezasi marko rubi'o, 22-mart küni xitayning korona wirusi mesilisidiki siyasitini qattiq tenqidlep, xitayning wirusning dunyagha keng kölemlik tarqilishigha yol achqanliqini eyiblidi.

Marko rubi'oning tekitlishiche, xitay, wirusning deslepki basquchigha da'ir achquchluq uchurlarni yoshurghan. Bashqa döletlerge tedbir almasliq heqqide bésim ishlitip, wirusning dunyawi yuqumgha aylinishini keltürüp chiqarghan.

Marko rubi'o bu sözlerni xitay hökümiti wuxende partlighan bu wirusning menbesining xitayda ikenlikini ret qilip, mes'uliyettin qéchishqa shundaqla dunyada özige ijabiy obraz tiklesh üchün tirishiwatqan mezgilde qildi. Xitayning wirus menbesining xitayda ikenlikini ret qilip, wirusni amérika armiyesining tarqatqanliqini ilgiri sürüshi amérikaning qattiq diplomatik naraziliqini qozghighan.

Xitayning amérikada turushluq bash elchisi suy tyenkey 22-mart amérikadiki "Aksi'oz" torining ziyaritini qobul qilip, xitay diplomatlirining bu sözlirige chüshenche bérishke mejbur bolghan. U wirusning qeyerdin tarqalghanliqini "Diplomatlar emes, tetqiqatchilar qarar qilishi kérekliki" ni ilgiri sürgen.

Marko rubi'o 22-mart amérika "Foks xewerliri" téléwiziyesining ziyaritini qobul qilghanda mundaq dégen: "Men shuni éytalaymenki, xitayning wirusni ashkarilimayla qalmay, bir qisim döletlerni bozek qilip, ayropilan qatnishini toxtatmasliqqa qistidi. Netijide wirus bashqa döletlerge tarqaldi. Chünki, ular prézidént tramp qilghandek qilmidi".

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet