Америка хитай азадлиқ армийәсигә четишлиқ болған хитай оқуғучилириниң визисини бикар қилишни ойлашмақта

Мухбиримиз ирадә
2020-05-28
Елхәт
Пикир
Share
Принт

Трамп һөкүмити америкадики университетларда оқуватқан, келип чиқиши хитай хәлқ азадлиқ армийәси билән четишлиқ болған миңлиған хитай аспирант оқуғучилири вә тәтқиқатчилириниң визисини бикар қилишни ойлашмақтикән.

«Ню-йорк вақти гезити» ниң ақсарайдики әһвалдин хәвәрдар кишиләрдин игилишичә, бу америкада оқуватқан чәтәллик оқуғучиларниң зор қисмини игиләйдиған хитай оқуғучиларға қаритилған тунҗи виза чәклимиси болуп қалидикән.

Мәзкур хәвәргә қариғанда, бу һәқтики учур хитайниң хоңкоңға даир «дөләт хәвпсизлики қануни» мақуллиши сәвәблик америка хитайға қарита җаза тәдбирлири йүргүзидиғанлиқини елан қилған мәзгилдә чиққан болсиму, әмәлийәттә хитай оқуғучиларға виза чәклимиси қоюш мәсилиси буниңдин хели бурунла музакирә қилинған икән, йәни бу америка федератсийә тәкшүрүш идарисиниң хитай һөкүмитиниң америка университетлиридики тәтқиқат темилиридин пайдилинип, техника җасуслуқи билән шуғуллиниватқанлиқи һәққидики агаһландурушиға қарита елинған тәдбир болуп һесаблинидикән.

Америка федератсийә тәкшүрүш идариси бу йил феврал ейида бир доклат елан қилип, хитайниң американиң илим-пәндики кәңчиликини суйиистемал қилип, америкадин техника оғрилаватқанлиқи, хитайниң «миң талант программиси» дегәндәк программилар вә һәрқайси университетлардики хитай тәтқиқатчилири вә вакаләтчилирини ишқа селиватқанлиқини билдүргән иди. Шу чағда йәнә америка федератсийә тәкшүрүш идариси хитайниң америка техникасини оғрилаш мәсилисигә алақидар 1000 дәк дело үстидә тәкшүрүш елип бериватқанлиқини билдүргән һәмдә 1‏-айниң ахирлири бостун шәһиридә хитай үчүн техника оғрилап бәргән 3 кишини қолға алған иди. Уларниң иккиси хитай, бири америкалиқ. Америкалиқ болғини харвард университети биохимийә факултетиниң мудири чарлес лейбер икән.

Пикирләр (0)
Share
Толуқ бәт