Хитай дөләт бихәтәрлик министирлики «җасуслуқ» һәрикәтлирини паш қилиш тор бекити қурди

Мухбиримиз әркин
2018-04-16
Елхәт
Пикир
Share
Принт

Хитай дөләт бихәтәрлик министирлики тор бекити қуруп, пуқраларни чәтәлниң җасуслуқ паалийәтлирини, «сотсиялистик системини ағдуруш» қа урунуштәк дөләт бихәтәрликигә хәвплик һәрикәтләрни мәлум қилишқа чақирған.

Мәзкур тор бекити 15-апрелдин башлап рәсмий ишқа киришкән болуп, у инглиз вә хитай тиллирида ечилған.

Фирансийә агентлиқиниң хәвәр қилишичә, тор бекитидә йәнә пуқралар дөләт хадимлириға, һәрбий офитсерларға пара бериш, қораллиқ исян яки миллий бөлгүнчиликкә қутратқулуқ қилиштәк һәрикәтләрни паш қилишқа чақирилған.

Тор бекити җасуслуқ әсваблирини ашкарилиған яки дөләт мәхпийәтликини сатқан вә сетивалған гумандарларни паш қилғучиларға мукапат берилидиғанлиқини билдүргән.

Униңда конкрет мукапат соммисини тилға елинмиған болсиму, лекин бейҗиң шәһәрлик дөләт бихәтәрлик идариси өткән йили елан қилған уқтурушида, җасуслуқ һәрикәтлирини паш қилғучиларға 1500 доллардин 73 миң долларғичә мукапат берилидиғанлиқини билдүргән иди. Лекин мәзкур тор бекити уйғур кишилик һоқуқ тәшкилатлирида әндишә пәйда қилди вә уларниң тәнқидигә учриди.

Дуня уйғур қурултийи баянатчиси дилшат ришитниң билдүрүшичә, бу тор бекити уйғурлар хитайниң мәмликәт миқясида нишанлиқ гумандарға айландуруп қоюлған бу мәзгилдә техиму көп уйғурларниң зиянкәшликкә учрап, тутқун қилиниши, из-дерәксиз ғайиб болуши яки орунсиз соал-сорақларға дуч келишини техиму еғирлаштуруветидикән.

Тор бекитидә йәнә «хитайда дөләт бихәтәрликигә хәвплик иш-һәрикәтләрдә болған яки шундақ һәрикәтләрдә болиду, дәп қаралған һәрқандақ кишиниң чәтәлликләр билән учришишиму йошурун хәвплик хаһишлар» ниң бири, дәп көрситилгән.

Пикирләр (0)
Share
Толуқ бәт