Бав тоң: “хитайниң қудрәтлик йеңи даһийси тарихтин савақ елиши лазим!”

Мухбиримиз әзиз
2017.11.13

Мәлум болушичә, хитай компартийәсиниң өткүзүлгән 19-қурултийида хитай рәиси ши җинпиң өз қарашлирини “ши җинпиң идийәси” дегән нам астида компартийә низамнамисигә киргүзгән иди.

Бу йил 85 яшқа киргән сабиқ компартийә әмәлдари бав тоң бу һәқтә сөз қилип, буни тәнқидлигән.

Америкидики “вашингтон почтиси” гезитиниң 11-ноябирдики мақалисидә көрситилишичә, бав тоң бу һәқтә пикир қилип “хитайниң үч миң йилдин ашидиған тарихида көплигән хан-падишаһлар өз қарашлири арқилиқ башқиларниң идийисини башқурмақчи болуп кәлгән. Әмма улардин һечким ғәлибә қилалиған әмәс” дегән. Шуниңдәк “ши җинпиң идийәси” дегән рамкидики чүшәнчиләрниң һечқанчә йеңилиқ әмәсликини, уларниң пәқәт мав зедоңниң сөзлиридин нәқил елинған мәзмунлар икәнликини алға сүргән.

Бав тоң бу һәқтә сөз болғанда “‛чоң сәкрәп илгириләш‚ сәвәбидин келип чиққан ачарчилиқ милйонлиған кишиләрни өлүмгә мәһкум қилғанда, шуниңдәк ‛мәдәнийәт зор инқилаби‚ да милйонлиған кишиләр ‛тазиланған‚ диму мав зедоң өзиниң хаталиқлирини һес қилалмиған. Әмма шу вақитларда һечким мав зедоңға қарши чиқалмиған” дегән.

У йәнә тарихтики чин сулалисини қурған чин шихуаң, җу ханиданлиқиниң залимлиқта даңқи чиққан падишаһи җу ливаң вә миң сулалисини қурған җу юәнҗаң қатарлиқларни мисал қилиш арқилиқ уларниңму өз вақтида өз қарашлирини башқиларға теңишқа урунғанлиқини, әмма буларниң һәммиси ғайәт зор тирагедийәләр билән ахирлашқанлиқини көрсәткән.

Мәлум болушичә, бав тоң хитай компартийәсиниң сабиқ баш секретари җав зияңниң катипи болуп, 1989-йилидики тйәнәнмен вәқәсидә оқуғучиларға һесдашлиқ қилғанлиқи үчүн йәттә йиллиқ қамаққа һөкүм қилинған. У һелиму ашкара болған қаттиқ назарәт ичидә яшимақта икән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.