Xitay merkiziy téléwiziye istansisining Uyghurlar heqqidiki xewiri guman qozghidi

Muxbirimiz shöhret hoshur
2017.12.20

Xitay merkiziy téléwiziye istansisi (CCTV) ning amérikida achqan qanili yéqinda Uyghur weziyiti heqqide bergen bir xewiride xitayning Uyghur rayonidiki weziyitini “Milletler arisida tosalghularni tügitip, dölet kimliki we iqtisadiy menpe'etlerdin ortaq behrimen bolushni yükseldürüshke merkezlishish, ” dep chüshendürgen.

Amérikining “Tashqi siyaset” zhurnili bügün maqale élan qilip, bu chüshendürüshni “Terepbazliq bilen xewer qilish” dégen. Xitay téléwiziyesining amérikidiki mezkur qanilini “Yat dölet wakaletchiliri” tizimlikige kirgüzüsh pikirini otturigha qoyghan mezkur maqalida bu qanalning terepbaz xewerchilik usuligha so'al qoyulghan. Maqalida “Kishilik hoquq teshkilatliri xitayning Uyghur rayonidiki éghir basturush we assimilyatsiye siyasetliri heqqide endishilirini bayan qiliwatqan, rayonda omumiy xelqning d n a ewrishkisi topliniwatqan, her yer-her yerde kaméra orunlashturuluwatqan bir rayonni néme üchün yuqiriqidek bir tereplime teswirleydu?” dep so'al qoyghan.

Melum bolushiche, xitayning merkiziy téléwiziye istansisi 2012‏-yildin bashlap amérikida mexsus qanal échip, öz namida xewerchilikni bashlighan, kéyinche bu qanalning nami“Xitay xelq'ara tor téléwiziyesi”, yeni “S g n t amérika” gha özgertilgen. “Tashqi siyaset” zhurnilining yuqiriqi xewiride déyilishiche, mezkur téléwiziye qanili hazirgha qeder xewerliride, bolupmu amérikigha a'it xewerlerde terepsiz bolghan bolsimu, emma xitaygha alaqidar xewerlerde pütünley xitay hökümitining teshwiqat siziqidin chiqmighan.

Mezkur zhurnalda pikir bayan qilghan alaqidar mutexessisler, xitayning mezkur qanilining amérikining “Yat dölet wakaletchiliri” (chet'el agéntliri) tizimlikige kirgüzülüshi kéreklikini otturigha qoyghan.

Igilinishiche, amérika chet'el hökümetlirining amérika jama'et pikirini qaymuqturushining aldini élish üchün, 1983‏-yili “Yat dölet wakaletchilirini tizimlitish qanuni” namliq bir qanun maqullighan. Mushu qanun boyiche, “Xitay kündilik” gézitining amérikida mulazimet qilidighan in'glizche bölümi “Yat dölet wakaletchiliri tizimliki” ge kirgüzülgen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.