Хитай японийәни җәнубий деңиздики игилик һоқуқ давасиға арилашмаслиққа чақирди

Мухбиримиз ирадә
2017.03.16

Ройтерс агентлиқи алдинқи күни тарқатқан бир хәвиридә, японийәниң талаш-тартиштики җәнубий деңизға өзиниң әң чоң уруш парахотини әвәтишни пиланлаватқанлиқини хәвәр қилған иди.

Пәйшәнбә күни хитай буниңға инкас қайтуруп, әгәр японийә җәнубий деңиз мәсилисигә чат керивалса, өзиниң буниңға қаттиқ җаваб қайтуридиғанлиқини билдүргән.

Ройтерсниң ейтишичә, исмини ашкарилашни халимиған бир мәнбә өзлиригә японийәниң “изумо” намлиқ тик учар тошуғучи уруш парахоти сингапор, һиндонезийә, филиппин вә сириланка қатарлиқ дөләтләрдә тохтап өткәндин кейин, америка вә һиндистан деңиз армийилириниң һинди окяндики малабар намлиқ бирләшмә һәрбий маневирға қатнишидиғанлиқини ейтқан. Гәрчә, хитай ташқи ишлар министирлиқи сәйшәнбә күнидики баянатида, японийә даирилириниң бу һәқтә чиққан хәвәрләрни рәсмийләштүрүшни күтүватқанлиқини ейтқан болсиму, әмма пәйшәнбә күнидики баянатида, японийә әгәр хитайниң игилик һоқуқиға хәвп елип келидиған һәрикәтләрдә болса, өзлириниңму буниңға күчлүк инкас қайтуридиғанлиқини, җәнубий деңиз мәсилисиниң японийә билән алақидар әмәсликини қайта-қайта әскәрткән. Әмма улар японийә тәрәпниң бу пилани һәққидики хәвәрләрни рәсмий қобул қилип-қилмиғанлиқи һәққидә бир нәрсә демигән.

Ройтерсниң ейтишичә, әгәр японийәниң җәнубий деңизға уруш парахотини әвәтидиғанлиқи раст болса, у һалда бу японийәниң иккинчи дуня урушидин бери районда тунҗи қетим һәрбий күчини намаян қилиши болуп һесаблинидикән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.