Xitay yaponiyeni jenubiy déngizdiki igilik hoquq dawasigha arilashmasliqqa chaqirdi

Roytérs agéntliqi aldinqi küni tarqatqan bir xewiride, yaponiyening talash-tartishtiki jenubiy déngizgha özining eng chong urush paraxotini ewetishni pilanlawatqanliqini xewer qilghan idi.

Peyshenbe küni xitay buninggha inkas qayturup, eger yaponiye jenubiy déngiz mesilisige chat kériwalsa, özining buninggha qattiq jawab qayturidighanliqini bildürgen.

Roytérsning éytishiche, ismini ashkarilashni xalimighan bir menbe özlirige yaponiyening “Izumo” namliq tik uchar toshughuchi urush paraxoti sin'gapor, hindonéziye, filippin we sirilanka qatarliq döletlerde toxtap ötkendin kéyin, amérika we hindistan déngiz armiyilirining hindi okyandiki malabar namliq birleshme herbiy manéwirgha qatnishidighanliqini éytqan. Gerche, xitay tashqi ishlar ministirliqi seyshenbe künidiki bayanatida, yaponiye da'irilirining bu heqte chiqqan xewerlerni resmiyleshtürüshni kütüwatqanliqini éytqan bolsimu, emma peyshenbe künidiki bayanatida, yaponiye eger xitayning igilik hoquqigha xewp élip kélidighan heriketlerde bolsa, özliriningmu buninggha küchlük inkas qayturidighanliqini, jenubiy déngiz mesilisining yaponiye bilen alaqidar emeslikini qayta-qayta eskertken. Emma ular yaponiye terepning bu pilani heqqidiki xewerlerni resmiy qobul qilip-qilmighanliqi heqqide bir nerse démigen.

Roytérsning éytishiche, eger yaponiyening jenubiy déngizgha urush paraxotini ewetidighanliqi rast bolsa, u halda bu yaponiyening ikkinchi dunya urushidin béri rayonda tunji qétim herbiy küchini namayan qilishi bolup hésablinidiken.