Xitay hökümiti rohin'ga musulmanlirigha yardem qilmaqchi

Muxbirimiz eziz
2018-06-29
Share

Xelq'ara axbarat sahesidiki eng qiziq témilardin bolghan bérmadiki rohin'ga musulmanlirining qirghin qilinish weqesi peskoygha chüshkende xitay hökümiti bügün özlirining rohin'ga musulmanlirigha insanperwerlik yardimide bolmaqchi ikenlikini bildürdi.

Birleshme agéntliqning 29-iyundiki xewiridin melum bolushiche, xitay tashqi ishlar ministiri wang yi bügün (jüme küni) bén'gal tashqi ishlar ministiri obul hesen mexmud bilen béyjingda söhbette bolghandin kéyin özlirining rohin'ga musapirlirigha yardemde bolidighanliqini bildürgen. U bu heqte söz qilip "Bén'gal hökümiti éhtiyajliq bolghan insanperwerlik yardemlirige tégishlik hesse qoshushni xalaymiz," dégen. Obul hesen mexmud özlirining rohin'ga musulmanlirini bén'galdin bérmagha qayturushqa munasiwetlik xizmetlerde öz'ara hemkarlishish toghriliq tepsiliy söhbetleshkenlikini éytqan.

Melum bolushiche, xitay hökümitining bu qarari dunya bankisi bén'galdiki rohin'ga musapirlirigha 480 milyon amérika dolliriliq maddiy yardem bérishni élan qilishining etisige toghra kelgen. Roytérs agéntliqining melumatlirigha qarighanda, hazir bén'galning koks baziri rayonida az dégendimu 700 mingdin artuq rohin'ga musulmanliri panahliniwatqan bolup, buni dunya boyiche eng chong musapirlar lagéri, déyishke bolidiken.

Rohin'ga musulmanlirining bérmadiki "Étnik qirghinchiliq" tin qoshna bolghan bén'galgha zor kölemde qéchip kélishi bilen bérma hökümiti xelq'araning qattiq eyiblishige uchrighan. Emma b d t ning alaqidar yighinlirida xitay wekilliri rohin'ga musulmanliri duch kelgen "Étnik qirghinchiliq" ni étirap qilmighan idi. Emdilikte ularning birdinla "Shepqetchi" qiyapitide otturigha chiqishi heqqide söz qilghan analizchilar "Xitay bu arqiliq xelq'araning közini boyimaqchi, shundaqla musulmanlar dunyasini yene bir qétim aldimaqchi," dédi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet