Xitay hökümiti firansiye, gérmaniye qatarliq alte döletni xitaygha wizisiz kirish tizimlikige kirgüzdi

24-Noyabir küni “Roytérs agéntliqi” qatarliq xelq'ara taratqularning xewer qilishiche, xitay hökümiti firansiye, gérmaniye, italiye, gollandiye, ispaniye, malaysiya qatarliq alte dölet puqralirini xitaygha wiza almay kirishke we 15 kün turushqa ruxset qilidighanliqini élan qilghan.

Xitay tashqi ishlar ministirliqi bayanatchisining bu heqtiki bayanatigha qarighanda, bu yil 12-ayning 1-künidin bashlap 2024-yili 11-ayning 30-künigiche yuqiriqi alte döletning puqraliri xitaygha bérip xizmet wezipisi béjirish, sayahet qilish, uruq-tughqan, dost-buraderlirini yoqlash üchün wiza telep qilmisimu bolidiken, emma xitayda turush waqti 15 kündin ashmasliqi kérek iken.

Xewerlerde texmin qilinishiche, xitayning buningdiki meqsiti xitayning chöküwatqan iqtisadini janlandurush we kowid yuqumidin kéyin kasatlashqan sayahetchilikini rawajlandurush iken. Chünki üch yilliq kowid yuqumi mezgilide xitay hökümiti xelq'ara awiyatsiye yollirini cheklep, xitayni sirtqi dunyadin ayriwetken. Kéyin gerche kowid qamal siyasiti ayaghliship, xelq'ara bardi-keldiler köpeygen bolsimu, iqtisad we sayahetchilikning eslige kélishi yenila tes bolghan.

Igilishimizche, bu xewer hazir fésbok qatarliq ijtima'iy taratqularda Uyghurlarningmu diqqet nuqtisigha aylan'ghan bolup “Firansiye, gérmaniye, gollandiye qatarliq döletlerning puqraliq salahiyitige érishken Uyghurlar xitaygha wizisiz kirelemdu yaki udul bérip xitayning aldam xaltisigha chüshemdu? ” dégen mesililer eng köp munazire qilinmaqta.