Қәшқәр кона шәһәр наһийисидики сайбағ йезилиқ мәктәпниң нами хитайчиға өзгәртилди

Уйғурбиз ториниң 26 - апрелдики хәвиридин мәлум болушичә, даириләр йеқинда, қәшқәр кона шәһәр наһийисидики сайбағ йезилиқ башланғуч мәктәпниң намини хитайчә “җиңхуй башланғуч мәктипи” дәп өзгәрткән.

Хәвәрдә дейилишичә, әслидики мәктәп бинасиниң бир қисми йеқинда чеқиветилип, йеңидин селинған 3 қәвәтлик оқутуш бинасиға хитайчә вә уйғурчә “җиңхуй” дегән хитайчә намниң йезилиши, йезидики уйғурларниң наразилиқини қозғиған.

Мәктәп наминиң хитайчиға өзгәртилгинигә наразилиқ билдүргән уйғурлар сайбағ мәркизи башланғуч мәктипиниң илгирики нами шу йезиға қарашлиқ капа кәнтиниң нами билән аталған болуп,кейин мәктәпкә сайбағ йезилиқ мәркизи башланғуч мәктәп дегән нам берилгәнликини, мана әмди мәктәпниң нами“җиңхуй”дәп өзгәртилип,мәктәпниң уйғурчә тәрҗимисиниңму пүтүнләй хитайчә аһаң тәрҗимиси бойичә атилиши йезидики уйғурларниң көңлини йерим қилип, наразилиқини қозғиғанлиқини билдүргән.

Бирнәччә йилдин буян уйғурлар топлишип олтурақлашқан кона мәһәллиләргә, коча - койларға хитайчә нам берилиш әһвали барғанчә еғирлашмақта.Радиомиз илгирики учурлиримизда уйғур елиниң ғулҗа, үрүмчи, қумул қатарлиқ шәһәрлиридә һәтта җәнубий уйғур елидики уйғурлар зич олтурақлашқан қәдимий юртлардики йәр - җай намлириниң әмәлдин қалдурулуп, бу җайларға хитайчә намлар бериливатқанлиқи уйғурларни нарази қиливатқанлиқини хәвәр қилған идуқ.