Хитайниң йүннән өлкисидә 3 мәсчитни печәтлиши йәрлик туңганларниң наразилиқини қозғиди

Мухбиримиз әркин
2018-12-31
Елхәт
Пикир
Share
Принт

Хитай даирилириниң йүннән өлкисидики вейшән наһийәсидә 3 мәсчитни «қанунсиз селинған» дегән сәвәб билән печәтләп, чеқишқа урунуши, йәрлик туңганларниң қаттиқ наразилиқиға учриған. Өткән шәнбә күни мәсчитни печәтләшкә кәлгән сақчилар билән йәрлик туңганлар оттурисида тоқунуш келип чиқип, бир қисим кишиләр тутқун қилинған. Хоңкоңдики «җәнубий хитай әтигәнлик почтиси» гезитиниң хәвиридә, даириләрниң өткән шәнбә күни вейшән наһийәсидики аталмиш «қанунсиз селинған» 3 мәсчитни печәтлигәнликини билдүргән. Хәвәрдә баян қилинишичә, вейшән наһийәлик тәшвиқат бөлүми вәқәдә адәм тутқун қилинғанлиқини дәлилләшни рәт қилип, лекин сақчиларниң қанунсиз ибадәткә қарши зөрүр тәдбирләрни алғанлиқини билдүргән. Йеқинда вейшән наһийәлик миллий вә диний ишлар комитети мәзкур наһийәниң хуйхуйдең, сәнҗа вә мамичаң йезилиридики 3 мәсчитниң «қанунсиз селинғанлиқи», бу мәсчитләрдә «қанунсиз диний тәрбийә» елип берилғанлиқини илгири сүрүп, бу мәсчитләрни печәтләш вә чеқишни қарар қилған. Лекин, бу қарар йәрлик етиқадчи туңган аммисиниң наразилиқини қозғиған.

Өткән шәнбә күни мәсчитни печәтләшкә кәлгән сақчилар билән мәсчит әһли оттурисида тоқунуш келип чиққан иди. Мәзкур вәқә хитай даирлириниң туңганлар мәркәзлик олтурақлашқан ниңшя вә гәнсуда әрәб тили мәктәплирини тақаш, әрәб йезиқини чәкләш, бәзи мәсчитләрни чеқишқа қарши йүз бәргән наразилиқ вәқәлиридин кейин йүз бәргән йәнә бир тоқунуштур. 

Бу йил язда даириләр ниңшядики вейҗу мәркизи мәсчитини «қанунжи селинған» дегән сәвәб билән чеқишқа буйриған. Бирақ бу йәрлик туңганларниң қаттиқ қаршилиқиға учрап, даириләр чеқишни кечиктүрүшкә мәҗбур болған иди. Көзәткүчиләрниң илгири сүрүшичә, нөвәттә хитай һөкүмити уйғур аптоном районида йол қоюп келиватқан ислам динини чәкләшкә даир бәзи тәдбирләрни ичкири өлкиләрдики туңган районлириға кеңәйтмәктә икән. Хитай һөкүмити илгири уйғур аптоном райони роза тутуш, закат бериш, һәҗ қилиш, сақал қоюш, һиҗаблиниш, балиларға диний исимларни қоюш, тәсбиһ тартиш, аилиләрдә диний китаб вә диний буюмларни сақлаш дегәндәкләрни вә һәр хил диний ибадәт шәкиллирини чәклигән. Хилаплиқ қилғучилар «диний әсәбийлик» билән әйиблинип, қамақ җазалириға һөкүм қилинған яки лагерларға елип кетилгән иди.

Пикирләр (0)
Share
Толуқ бәт