Xitayda bir tunggan meschitining qurulushi musulmanlargha qarshi qattiq bes-munazire qozghidi

Muxbirimiz erkin
2017-04-10
Share

Xitayning enxuy ölkisi xéféy shehiridiki nen'gang tunggan meschitining qurulushi xitay ijtima'iy taratqulirida bes munazire qozghap, munazire musulmanlargha qarshi haqaret, tehdit we hujumgha aylan'ghan. Meschitning yéngi ornigha qoshna olturaq rayondiki bezi xitay ahaliler meschit sélishqa qarshi chiqqan. Meschitning tunggan imami taw yingshéng tehdit xéti tapshuruwalghan.

Birleshme agéntliqining düshenbe küni xewer qilishiche, nen'gang meschitining qurulushi bes-munazire qozghap, uning musulmanlargha qarshi keypiyatqa aylinishida Uyghur aptonom rayonidiki bir xitay teshwiqat kadiri qutratquluq rol oynighan. Suy zijyen isimlik bu teshwiqat kadiri 2016‏-yili 12‏-ayda özining sina mikro blogida, meschit qurulushni tosushni, eger bu aqmisa meschitning ornigha choshqa qéni éqitishni we choshqa béshi kömüshni otturigha qoyup, munazire qozghighan idi.

Birleshme agéntliqining xewiride bildürüshiche, netijide, meschit qurulushigha qarshi chiqqan qoshna olturaq rayondiki bir türküm ahale lozunkilar bilen meschit sélinidighan orunni qorshiwélip, uninggha choshqa béshini kömgen.
Nen'gang meschiti 1780‏-yili qurulghan kona meschit bolup, yerlik da'iriler 2016‏-yili meschit mutiwelli hey'iti bilen meschitni hazirqi ornidin bashqa yerge köchürüsh heqqide kélishim hasil qilghan idi. Chet'el axbaratining bildürüshiche, "Nen'gang meschit weqesi" xitayda musulmanlargha qarshi keypiyatning qanchilik téz tarqawatqanliqining ipadisiken.

Birleshme agéntliqi düshenbe küni tarqatqan xewiride, "Bu weqe özining shinjangdiki basturushini qanunluq qilish üchün islam düshmenlikining torda ewjige chiqishigha yol qoyghan kompartiyesige nisbeten dishwarchiliq" dégen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.