Xelq'ara diniy erkinlik komitéti: “Xitayning diniy guruppilargha qaritilghan basturushliridin endishe qilmaqtimiz”

Amérika dölet mejlisi teripidin tesis qilin'ghan xelq'araliq diniy erkinlik komitéti tünügün, yeni 11-séntebir küni bayanat élan qilip, xitayning yéqinqi mezgillerde diniy erkinlikni depsende qilidighan bir qatar qattiq basturushlarni kücheytiwatqanliqini we buningdin endishe qiliwatqanliqini bayan qildi.

Bayanatta ötken heptining axirida amérikining gholluq axbarat wasitiliride Uyghurlardin bir milyondin artuq kishining yighiwélish lagérigha soliwélin'ghanliqi heqqide ishenchlik xewerler bérilgenliki tilgha élinip, xitayning bu qilmishi qattiq eyiblendi.

“Lagérlar qorqunchluq” dep süpetlen'gen bu bayanatta xitayning Uyghurlargha qarita bu xil sotsiz jaza ijra'atliri dawam qiliwatqan bir peytte béyjingda zi'on chérkawining arqa-arqidin axturulghanliqi we taqiwétilgenliki eslitildi.

Mezkur komitét bu bayanatida xitayning Uyghurlardin bashqa yene tibet buddistliri bilen falon'gung muritlirining diniy erkinlikigimu éghir derijide dexli-teruz yetküzüwatqanliqi eyiblendi.

B d t kishilik hoquq komitétining aliy komissari mishél bachélét (Michelle Bachelet) aldinqi küni xitayni Uyghur aptonom rayonidiki yighiwélish lagérlirini tekshürüshke échiwétishke we bu heqte sözlishishke dewet qilghan. Buninggha qarita xitay tashqi ishlar ministirliqining bayanatchisi tünügün jawab qayturup, b d t ni xitayning igilik hoquqigha hörmet qilishqa ündigen idi.