Хитай диний әркинликтә «алаһидә диққәт қилинидиған дөләт» тизимликигә киргүзүлгән

Мухбиримиз сада
2018-12-12
Елхәт
Пикир
Share
Принт

Америка дөләт мәҗлиси 1998-йили елан қилинған «хәлқара диний әркинлик қануни» ға асасән хитайни өз ичигә алған 10 дәк дөләтни диний әркинлик мәсилисидә «алаһидә диққәт қилинидиған дөләт» тизимликигә киргүзгән.

«Америка авази» ниң 12-декабир күнидики хәвиридин мәлум болушичә, америка ташқи ишлар министири майк помпйо бу һәқтә елан қилған баянатида юқирида тилға елип өткән 10 дөләтниң системилиқ, узақ мәзгиллик вә интайин қәбиһ болған диний әркинлик дәпсәндичилики билән шуғуллиниватқанлиқини нуқтилиқ тәкитлигән.

Хәвәрдә йәнә америка дөләт ишлири министирлиқиниң хәлқара дини әркинликкә мәсул алаһидә әлчиси сам бровнбәкниң хитайниң диний әркинлик дәпсәндичилики һәққидә қилған сөзиму нәқил елинған. У баян қилип, «мениң һазир хитайдин әң әнсирәйдиғиним, уларниң диний топларға зиянкәшлик қилмиши барғансери күчийиватиду. Доклатларда дейилгән 800 миңдин икки милйонғичә болған тутқунларниң ичидә уйғурлардин башқа йәнә қазақ вә башқа аз санлиқ милләтләрму бар. Уларниң көпинчиси мусулман хәлқ. Хитай диний зиянкәшликни тохтитиш уяқта турсун, техиму кеңәйтиватиду. Мана бу америка һөкүмитини әң әнсиритидиған бир нуқта,» дегән.

Америка дөләт мәҗлиси өткән 19 йилдин бери хитайни изчил диний әркинлик мәсилисидә «алаһидә диққәт қилинидиған» дөләт қатариға киргүзүп кәлгән. Һалбуки, 2017-йили бейҗиң даирилири диний әркинлик контроллуқини давамлиқ күчәйтидиғанлиқини билдүрүп, «әгәр бу хил диний паалийәтләр һөкүмәт тәрипидин тәһдит дәп қаралса, кишиләрниң диний әркинлики чоқум контроллуқ астиға елинидиғанлиқини» тәкитлигән иди.

Пикирләр (0)
Share
Толуқ бәт