Xitay diniy erkinlikte "Alahide diqqet qilinidighan dölet" tizimlikige kirgüzülgen

Muxbirimiz sada
2018-12-12
Share

Amérika dölet mejlisi 1998-yili élan qilin'ghan "Xelq'ara diniy erkinlik qanuni" gha asasen xitayni öz ichige alghan 10 dek döletni diniy erkinlik mesiliside "Alahide diqqet qilinidighan dölet" tizimlikige kirgüzgen.

"Amérika awazi" ning 12-dékabir künidiki xewiridin melum bolushiche, amérika tashqi ishlar ministiri mayk pompyo bu heqte élan qilghan bayanatida yuqirida tilgha élip ötken 10 döletning sistémiliq, uzaq mezgillik we intayin qebih bolghan diniy erkinlik depsendichiliki bilen shughulliniwatqanliqini nuqtiliq tekitligen.

Xewerde yene amérika dölet ishliri ministirliqining xelq'ara dini erkinlikke mes'ul alahide elchisi sam brownbekning xitayning diniy erkinlik depsendichiliki heqqide qilghan sözimu neqil élin'ghan. U bayan qilip, "Méning hazir xitaydin eng ensireydighinim, ularning diniy toplargha ziyankeshlik qilmishi barghanséri küchiyiwatidu. Doklatlarda déyilgen 800 mingdin ikki milyon'ghiche bolghan tutqunlarning ichide Uyghurlardin bashqa yene qazaq we bashqa az sanliq milletlermu bar. Ularning köpinchisi musulman xelq. Xitay diniy ziyankeshlikni toxtitish uyaqta tursun, téximu kéngeytiwatidu. Mana bu amérika hökümitini eng ensiritidighan bir nuqta," dégen.

Amérika dölet mejlisi ötken 19 yildin béri xitayni izchil diniy erkinlik mesiliside "Alahide diqqet qilinidighan" dölet qatarigha kirgüzüp kelgen. Halbuki, 2017-yili béyjing da'iriliri diniy erkinlik kontrolluqini dawamliq kücheytidighanliqini bildürüp, "Eger bu xil diniy pa'aliyetler hökümet teripidin tehdit dep qaralsa, kishilerning diniy erkinliki choqum kontrolluq astigha élinidighanliqini" tekitligen idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet