Американиң ташқи ишлар журнили: хитай интернетқа әҗәллик зәрбә бәрмәкчи

Мухбиримиз шөһрәт һошур
2017.08.28

Америкидики мәшһур “ташқи ишлар” журнилида бүгүн “хитай интернетқа әҗәллик зәрбә бәрмәкчи” мавзулуқ бир мақалә елан қилинди.

Мақалидә хитай ютуб, гугул вә тивиттир қатарлиқ дунядики мәшһур илғар интернет мулазимәтлирини чәкләп болғандин кейин, әмдиликтә ташқи дунядики интернет ториға улишишниң бирдин‏- бир йоли болған VPN мулазимитиниму йоқ қилишқа урунуватқанлиқи баян қилинған.

Аптор җамес палмер тәрипидин йезилған бу мақалидә, хитайниң интернетқа бу қәдәр дүшмәнлик қилишиниң мәқсити учурни контрол қилиш әмәс, бәлки 2011-йили мисирда, униңдин кейин окраинийәдә йүз бәргән әркинлик исяниниң хитайда баш көтүрүп қелишидин қорқуш икәнлики баян қилинған.

Бу хил чәклимиләрниң ялғуз сиясий өктичиләргила әмәс, сода-карханичиларға, тәтқиқатчиларға, йәни җәмийәтниң пүткүл саһәсигә путликашаң туғдуруватқанлиқи илгири сүрүлгән бу мәзкур мақалидә, хитайниң бу қилмишиниң ақивәттә өзигә зиян вә хәтәр елип келидиғанлиқи тәкитләнгән.

Мақалидә йәнә, в пи ән ширкитиниң хитайниң дәл мушу хил тосқунлуқлириға қарши давамлиқ һалда техника вә әслиһәсини ислаһ қилип вә тәрәққий қилдуруп туруватқанлиқи әскәртилгән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.