Хитай һөкүмити ислам дининиң «сиңип кириши» ниң алдини елишқа тиришмақта

Мухбиримиз әзиз
2018-03-12
Елхәт
Пикир
Share
Принт

Хитайдики «мәмликәтлик ислам дини җәмийити» ниң билдүрүшичә, хитай һөкүмити нөвәттә әсәбийлик яки зорлуқ һәрикәтлирини тосуш үчүн ислам дининиң һәрқандақ шәкилдики «сиңип кириш» яки «кеңийиш» иниң алдини алмақчи икән.

Ройтерс агентлиқиниң 12-марттики хәвиридә ейтилишичә, һазир хитай тәвәсигә чәтәлдин һәрқандақ «исламий» мәзмунниң кириши қәтий мәни қилинидикән.

Хитай «ислам дини җәмийити» ниң рәиси яң фамиң бу һәқтә ройтерсқа сөз қилип, «бәзиләр диний қаидиләрни бәкла тәкитләп, дөләтниң қанунини бир яққа қайрип қоюватиду. Биз бу хил әһвалға қарита һошяр болмисақ болмайду» дегән.

Хәвәрдә көрситилишичә, хитайдики алақидар бәлгилимиләргә асасән чәтәлдики мәсчит нусхилирини бинакарлиқ үлгиси қилиш, һалал бәлгилирини тәшвиқ қилиш, диний бәлгилимиләрни күндилик турмушқа тәтбиқлашни тәшәббус қилиш дегәнләр бирдәк қанунсизлиқ һесаблинидикән. яң фамиң бу һәқтә тохтилип, «ислам дини җәзмән техиму қоюқ һалда хитайчә алаһидиликкә игә болуши, сотсиялизмниң ядролуқ қиммәт қариши бойичә раваҗлиниши һәмдә ‹әсәбийлик' кә қарши туруши лазим» дегән.

Мәлум болушичә, хитай һөкүмити йеқинқи йиллардин буян пат-патла «ислам әсәбийлики» гә қарши турушни тәкитләп келиватқан болуп, хитайға қошна болған дөләтләрдин «әсәбийлик уруқлири» ниң кириватқанлиқини, шуңа бу амилларға қаттиқ зәрбә бериш лазимлиқини ейтип кәлгән. Әмма ройтерсниң хәвиридә паалийәтчиләрниң «қаршилиқ һәрикәтлири әмәлийәттә уйғурларниң диний етиқади һәмдә мәдәнийәт һәқлиригә қаритилған қаттиқ контроллуққа җаваб тәриқисидә оттуриға чиққан» дегән сөзлири алаһидә орун алиду.

Пикирләр (0)
Share
Толуқ бәт