Xitay hökümiti islam dinining "Singip kirishi" ning aldini élishqa tirishmaqta

Muxbirimiz eziz
2018-03-12
Élxet
Pikir
Share
Print

Xitaydiki "Memliketlik islam dini jem'iyiti" ning bildürüshiche, xitay hökümiti nöwette esebiylik yaki zorluq heriketlirini tosush üchün islam dinining herqandaq shekildiki "Singip kirish" yaki "Kéngiyish" ining aldini almaqchi iken.

Roytérs agéntliqining 12-marttiki xewiride éytilishiche, hazir xitay tewesige chet'eldin herqandaq "Islamiy" mezmunning kirishi qet'iy men'i qilinidiken.

Xitay "Islam dini jem'iyiti" ning re'isi yang faming bu heqte roytérsqa söz qilip, "Beziler diniy qa'idilerni bekla tekitlep, döletning qanunini bir yaqqa qayrip qoyuwatidu. Biz bu xil ehwalgha qarita hoshyar bolmisaq bolmaydu" dégen.

Xewerde körsitilishiche, xitaydiki alaqidar belgilimilerge asasen chet'eldiki meschit nusxilirini binakarliq ülgisi qilish, halal belgilirini teshwiq qilish, diniy belgilimilerni kündilik turmushqa tetbiqlashni teshebbus qilish dégenler birdek qanunsizliq hésablinidiken. Yang faming bu heqte toxtilip, "Islam dini jezmen téximu qoyuq halda xitayche alahidilikke ige bolushi, sotsiyalizmning yadroluq qimmet qarishi boyiche rawajlinishi hemde 'esebiylik' ke qarshi turushi lazim" dégen.

Melum bolushiche, xitay hökümiti yéqinqi yillardin buyan pat-patla "Islam esebiyliki" ge qarshi turushni tekitlep kéliwatqan bolup, xitaygha qoshna bolghan döletlerdin "Esebiylik uruqliri" ning kiriwatqanliqini, shunga bu amillargha qattiq zerbe bérish lazimliqini éytip kelgen. Emma roytérsning xewiride pa'aliyetchilerning "Qarshiliq heriketliri emeliyette Uyghurlarning diniy étiqadi hemde medeniyet heqlirige qaritilghan qattiq kontrolluqqa jawab teriqiside otturigha chiqqan" dégen sözliri alahide orun alidu.

Toluq bet