Kiris simit: "Amérika xitaydiki kishilik hoquq depsendichilikige süküt qilmasliqi kérek"

Muxbirimiz irade
2018-04-25
Élxet
Pikir
Share
Print

Amérika dölet mejlisi ezasi kiris simit bügün "Amérika xitaydiki kishilik hoquq depsendichilikige süküt qilmasliqi kérek", dédi.

Amérika dölet mejlisining tor bétide élan qilin'ghan mezkur xewerde éytilishiche, dölet mejlisi ezasi, dölet mejlisi qarmiqidiki xitay ishliri komitétining mu'awin re'isi kiris simit ependi seyshenbe küni "2017-Yili xitaydiki kishilik hoquq weziyiti üchün élip éytqanda, intayin qarangghu bir yil boldi," dégen.

U mundaq dégen: "Nobél tinchliq mukapatining sahibi lyu shyawboning ölümidin tartip, xitaydiki kishilik hoquq adwokatliri, siyasiy pa'aliyetchiler we ularning a'ililiri uchrawatqan zomigerlikkiche shundaqla minglighan Uyghurlarning tutqun qilinishighiche xitay kommunist partiyesining xitay puqralirigha bolghan bésimi her jehettin hessilep kücheydi. Xitaydiki ténchusul bilen özini ipade qilish erkinliki, yighilish we dini pa'aliyet ötküzüsh erkinliki künsayin ajizlap mangdi. Öz hakimiyiti mezgilide kishilik hoquqni éghir depsende qiliwatqan shi jinping özining hoquqini yenimu küchlendürüwatqan bir shara'itta bizge oxshash erkin dunyada yashawatqanlar choqum herbir pursetni ching tutup, xitaydiki zulumgha uchrawatqanlar üchün awazimizni chiqirishimiz kérek."

Kiris simit ependi yene mundaq dégen: "Dunyaning közi bizde. Ular, amérika heqsizliqqa uchrawatqan, türmilerge solan'ghan, tehditke uchrawatqan we qéyin-qistaqlargha duch kéliwatqanlar üchün zadi gep qilamdu-yoq, dep bizni közetmekte. Amérika qoshma shtatliri hergizmu xitay hökümitining zulumigha uchrawatqanlar mesiliside sükütte turmasliqi kérek. Bizning rehberlirimiz bu mesilini choqum xitayning aldida ochuq-ashkara otturigha qoyushni dawamlashturushi kérek."

Kiris simit xitaydiki kishilik hoquq weziyitige yéqindin köngül bölüwatqan amérika dölet mejlisining ezaliridin bir. U yéqinda amérika kéngesh palata ezasi marko rubiyo bilen birlikte amérikining xitayda turushluq bash elchisi térry brandstandqa mektup yollap, uning Uyghur rayonidiki "Yépiq terbiyelesh lagérliri" ni tekshürüp chiqishini telep qilghan idi.

Toluq bet