Amérika bash elchi namzati kishilik hoquq mesiliside xitaygha tighmu-tigh turidighanliqini bildürdi

Muxbirimiz gülchéhre
2017-05-02
Élxet
Pikir
Share
Print

Amérika prézidént donald trampning xitayda turushluq amérika elchilikige tallighan namzati tériy branstand, eger kéngesh palatasining testiqidin ötse, özining kishilik hoquq mesiliside xitaygha tighmu-tigh turidighanliqini we xitay öktichi aktiplirini qobul qilidighanliqini bildürdi.

Tériy branstad bu sözlerni seyshenbe küni amérika kéngesh palatasining guwahliq bérish yighinida qilghan. Amérika ayuwa shtatining nöwettiki shtat bashliqi tériy branstad guwahliq bérish yighinida yene, bash elchilikke qoyulsa her bir xitay ölkisini aylinip chiqidighanliqini qeyt qildi.

Birleshme agéntliqining xewer qilishiche, tériy branstadning xitay re'isi shi jinping bilen uzun yilliq tonushluqi bar iken. Ular 1985‏-yili shi jinping bir xitay yéza igilik wekiller ömikini bashlap ayuwani ziyaret qilghanda tonushqan. Biraq branstad seyshenbe küni kéngesh palatasidiki guwahliq sözide, "Xitay rehbiri bizni qedinas dost, dep atisimu, biraq bu, méning kishilik hoquq yaki eqliy mülk hoquqigha oxshash mesililerni otturigha qoyushqa ikkilinidighanliqim yaki arisaldi bolidighanliqidin dérek bermeydu" dédi. Tériy branstad yene xitayning jenubiy déngizda yasighan "Sün'iy arallar" mesiliside qattiq qol bolidighanliqini bildürüp, "Xitaygha, uning sün'iy arallarni qollinip, qoshna döletlerni mejburlishi yaki déngiz‏-hawa qatnash erkinlikini cheklishige yol qoyushqa bolmaydu" dep körsetti.

U, shimaliy koréyeni yadro qorallardin waz kéchishke mejburlash üchün, özining xitay bilen bolghan uzun yilliq alaqisini qollinip, piyongyanggha qarshi téximu qattiq diplomatik we iqtisadi charilerni qollinishqa qistaydighanliqini bildürdi.

Toluq bet