Xitaydiki bir qisim orunlarda korona wirusining yéngi wariyantini tekshürüsh siniqi qayta bashlan'ghan

Washin'gtondin muxbirimiz irade teyyarlidi
2023.12.07

 Xitayning herqaysi chong sheherliridiki doxturxana we qatnash merkezliride korona wirusining yéngi wariyantini tekshürüshining qayta bashlan'ghanliqi melum.

Radiyomizning béyjingdiki bir qisim ahalilerdin we hökümet chiqarghan uqturushlardin igilishiche, béyjingda nepes yolliri késellikliri bilen doxturgha kéliwatqan balilar we chonglarning barghanséri köpiyishi netijiside, da'iriler korona wirusi siniqini qaytidin bashlighan.

Xitay da'iriliri yéqinqi xewerliride xitayda öpke yallughi we bashqa nepes yoli késelliklirining köpeygenlikini étirap qilip, uninggha kokél mékoplazma öpke yallughi, nepes yoli birikme wirusi, pesil xaraktérlik tarqilishchan zukam we COVID-19 qatarliq késellik qozghatquchilar seweb boluwatqanliqini ilgiri sürgen idi.

Biraq hazir xitay hökümiti teripidin tarqitilghan uqturushlarda, korona wirusi bilen yuqumlinishning yéngi dolquni heqqide agahlandurush bériliwatqan bolup, xitayning dölet ishliri mehkimisi yene yerlik hökümetlerni port we ayrodurumlarda, mektep, sanatoriye we bashqa orunlarda wirus siniqini we késelliklerni nazaret qilishni eslige keltürüshke buyrughan iken.

Béyjingdiki ismini ashkarilashni xalimighan bir ahalining radiyomiz xitay bölümige qilghan sözide qattiq aghrip ketkenliktin doxturxanida jiddiy dawaliniwatqan qizigha korona siniqi qilin'ghanliqini éytip, “Xewerlerde korona wirusini tilgha almighan bilen, emeliyette bu wirusning shekil özgertken yéngi nusxisi keng tarqilip ketkendek qilidu.” dégen.

Yene bir béyjing ahalisimu chongraq wogzal we xelq'ara ayrodurumlarda we bezi yighin meydanlirida heqsiz korona siniqi qiliniwatqanliqini éytqan.

Melum bolushiche, xitaydiki ahaliler wirus siniqining peyda bolghanliqini körüp, buning aqiwitide ilgirikidek “Yuqumni nölge chüshürüsh” siyasiti bilen kishilerni aylap öyge solitiwétidighan tedbirlerning qaytip kélishidin endishilenmektiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.