Хитайда 14 йилдин буян талаш-тартиш қилиниватқан «мусулманчә йемәклик қануни» түзүш лайиһәси суға чилашқан

Мухбиримиз қутлан
2016-11-07
Елхәт
Пикир
Share
Принт

Хитай дөләтлик милләтләр ишлири комитети 2002-йили «мусулманчә йемәклик қануни» түзүш һәққидә хитай мәмликәтлик хәлқ қурултийиға лайиһә сунған болсиму, лекин һазирғичә хитайда бундақ бир қанун мақулланмиған.

Йеқинқи йиллардин буян хитайда мусулманчә йемәкликләргә сахтилиқ ишлитиш яки сахта марка ясаш вәқәлири йүз берип уйғур, туңган қатарлиқ мусулман хәлқләрниң қаттиқ наразилиқини қозғиған болсиму, әмма хитай һөкүмити «мусулманчә йемәклик қануни» ни мақуллаш ишини күнтәртипкә киргүзмигән.

Йеқинқи икки йил мабәйнидә уйғур аптоном райони, ниңшя, чиңхәй, гәнсу қатарлиқ җайларда көп қетим «һалал» тамғиси бесилған чошқа гөши яки сахта қой гөшлириниң базарға селиниши уйғур вә туңган мусулманлириниң күчлүк наразилиқини қозғиған. Һалбуки, хитай һөкүмити бу сәзгүр мәсилидә изчил һалда сүкүт қилиш позитсийәсидә болған.

Бу йил 18-апрел күни «йәр шари вақит гезити» мақалә елан қилип, хитай һөкүмитиниң «мусулманчә йемәклик қануни» түзүш һәққидики лайиһәни 2016-йиллиқ қанун турғузуш күнтәртипидә музакирә қилмайдиғанлиқини билдүргән. Шуниң билән бир вақитта йәнә, хитай һөкүмити «мусулманчә йемәклик қануни» түзүш лайиһәсидә чиң турған дөләтлик милләтләр ишлири комитетиниң туңган мудири ваң җеңвейни вәзиписидин елип ташлиған.

Көзәткүчиләр, бу әһваллар 88 милйон компартийә әзаси болған вә динсизлиқ тәрғиб қилинидиған хитайда «мусулманчә йемәклик қануни» мақуллинишидин һечқандақ үмидниң йоқлуқини көрситип бериду, дәп қаримақта.

Пикирләр (0)
Share
Толуқ бәт