Xitayda 14 yildin buyan talash-tartish qiliniwatqan "Musulmanche yémeklik qanuni" tüzüsh layihesi sugha chilashqan

Muxbirimiz qutlan
2016-11-07
Share

Xitay döletlik milletler ishliri komitéti 2002-yili "Musulmanche yémeklik qanuni" tüzüsh heqqide xitay memliketlik xelq qurultiyigha layihe sun'ghan bolsimu, lékin hazirghiche xitayda bundaq bir qanun maqullanmighan.

Yéqinqi yillardin buyan xitayda musulmanche yémekliklerge saxtiliq ishlitish yaki saxta marka yasash weqeliri yüz bérip Uyghur, tunggan qatarliq musulman xelqlerning qattiq naraziliqini qozghighan bolsimu, emma xitay hökümiti "Musulmanche yémeklik qanuni" ni maqullash ishini küntertipke kirgüzmigen.

Yéqinqi ikki yil mabeynide Uyghur aptonom rayoni, ningshya, chingxey, gensu qatarliq jaylarda köp qétim "Halal" tamghisi bésilghan choshqa göshi yaki saxta qoy göshlirining bazargha sélinishi Uyghur we tunggan musulmanlirining küchlük naraziliqini qozghighan. Halbuki, xitay hökümiti bu sezgür mesilide izchil halda süküt qilish pozitsiyeside bolghan.

Bu yil 18-aprél küni "Yer shari waqit géziti" maqale élan qilip, xitay hökümitining "Musulmanche yémeklik qanuni" tüzüsh heqqidiki layiheni 2016-yilliq qanun turghuzush küntertipide muzakire qilmaydighanliqini bildürgen. Shuning bilen bir waqitta yene, xitay hökümiti "Musulmanche yémeklik qanuni" tüzüsh layiheside ching turghan döletlik milletler ishliri komitétining tunggan mudiri wang jéngwéyni wezipisidin élip tashlighan.

Közetküchiler, bu ehwallar 88 milyon kompartiye ezasi bolghan we dinsizliq terghib qilinidighan xitayda "Musulmanche yémeklik qanuni" maqullinishidin héchqandaq ümidning yoqluqini körsitip béridu, dep qarimaqta.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.