Чеграсиз мухбирлар тәшкилати: хитай мухбирларни түрмигә әң көп солиған дөләт

Мухбиримиз әркин
2017.12.19

Хәлқара кәчүрүм тәшкилати сәйшәнбә күни доклат елан қилип, 2017‏-йили хитайниң мухбирларни түрмигә әң көп солиған дөләт тикәнликини билдүрди.

Чеграсиз мухбирлар тәшкилатиниң доклатида қәйт қилишичә, бу йил дуня миқясида 65 нәпәр мухбир вә ахбарат хизмәтчиси өлтүрүлгән. 326 Нәпәр мухбир түрмигә соланған. Лекин чеграсиз мухбирлар тәшкилати доклатида, бу йил хитайниң дунядики мухбирларни түрмигә әң көп солиған дөләт икәнликини билдүрди.

Доклатта баян қилишичә, 2017‏-йили өлтүрүлгән мухбир вә ахбарат хизмәтчилириниң сани бултурқидин азайған болсиму, бирақ зиянкәшликкә учриған аял мухбирларниң сани артқан. Доклатта, 2017‏-йили өлтүрүлгән мухбир вә ахбарат хадимлириниң аз дегәндә 50 нәпириниң кәспий мухбир икәнлики, 7 нәпири ихтияри мухбир, 8 нәпириниң ярдәмчи ахбарат хадими икәнликини билдүрди.

Доклатта қәйт қилишичә, бу йил йеқинқи 14 йилдин бери мухбирлар әң аз өлтүрүлгән бир йил икән. Доклатта, мухбир вә ахбарат хадимлириниң өлтүрүлүши бу йил бултурқидин азийишида уларниң хәтәрлик районларға бериши азийиватқанлиқи асаслиқ рол ойниғанлиқини билдүргән.

Доклатта баян қилишичә, 2017‏-йили дуня миқясида түрмигә соланған 326 нәпәр мухбирниң 52 нәпири хитайда болуп, у дуняда мухбирларни түрмигә әң көп солиған дөләт икән. Чеграсиз мухбирлар тәшкилати доклатида йәнә, хитай даирилириниң тутқунларниң тутуп туруш вақтини узартиш, тутқунларниң саламәтлик әһвалини зәипләштүрүш қатарлиқ усулларни қоллинип, өктичи затларни бастуруватқанлиқини билдүргән.

Доклатта: “һөкүмәт өзигә қарши турғучиларға өлүм җазаси бәрмәйдиған болди. Әмма уларниң саламәтлик әһвалини начарлаштуруп, уларни өлүмгә мәһкум қиливатиду”дегән. Бу йил түрмидики нобел тинчлиқ мукапати саһиби лю шавбо билән хитай өктичи яң тоңйән рак кесилигә грипдар болуп өлгән. Даириләр лю шавбониң рак кесили ахирқи басқучқа келип қалғанда андин уни дохтурханиға елип чиққан иди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.