Firansuz muxbir Uyghurlar heqqidiki maqalisi seweblik xitaydin chiqiriwétilishi mumkinlikini bildürdi

Firansiyelik muxbir ursula gotiyér xanim “Nyu-york waqti” gézitige söz qilip, özining Uyghurlar heqqide yazghan maqalisi seweblik xitaydin chiqiriwétilish éhtimalliqi barliqini bildürgen. U 22-dékabir künidiki sözide, xitaydiki muxbirliq kinishkisining hazirghiche yéngilanmighanliqini, eger bu dawam qilghan teqdirde, özining 1-yanwardin burun xitaydin chiqip kétishke mejbur bolidighanliqini bildürgen.

Ursula gotiyir firansiyede neshrdin chiqidighan “Lobis” namliq xewer zhurnilining béyjingda turushluq muxbiri. U mezkur zhurnalda xitay hökümitining Uyghur élidiki “Térrorluqqa qarshi urushi” gha qarita bezi gumaniy qarashlirini ipadiligendin kéyin, xitay hökümitining nishanigha aylinip qalghan idi. U hetta xitay tashqi ishlar ministirliqi teripidin chaqirtilip, “Xata xewer bergenlikini étirap qilish” qa mejburlan'ghan.

Ursula xanim özining “Xitayning parizh hujumidin kéyinki hemkarliq chaqiriqi yoshurun meqsetke ige” mawzuluq maqaliside, parizhdiki térror hujumidin kéyin shi jinpingning derhal firansiye bilen térrorluqqa qarshi ortaq küresh qilidighanliqini jakarlighanliqini, emma buning meqsetlik ikenlikini eskertish bilen birge, baydiki kömür kanda yüz bergen weqening eslide yerlik Uyghurlarning zulumgha chidimay ep barghan naraziliq herikiti ikenlikini, uni xelq'ara jihad herikitige baghlaydighan küchlük ispat yoqluqini bayan qilghan.

Ursulaning “Nyu-york waqti” gézitige éytishiche, adette xitayda xizmet qilidighan chet'ellik muxbirlarning ruxset kinishkisi her yili 11-aydin 12-ayning béshighiche bolghan ariliqta yéngilinip bolidiken. Emma u hazirghiche xitay tashqi ishlar ministirliqidin xet tapshuruwalmighan. Uning bu mesilisi bilen alaqidar boluwatqan firansuz diplomatlardinmu jawab kelmigen.

Chégrasiz muxbirlar teshkilati we xitayda turushluq chet'ellik muxbirlar kulubi eyni chaghda élan qilghan bayanatida, xitay hökümitini “Muxbirlargha tehdit qilip, pikir erkinlikini cheklesh” bilen eyibligen idi.