Шенҗин аяқ завути ишчилири иш ташлиди

Мухбиримиз меһрибан
2014-03-11
Елхәт
Пикир
Share
Принт

Радиомиз игилигән учурлардин мәлум болушичә, 10-март күни шенҗин шәһири йили завутидики 3000 нәпәр ишчи коллектип иш ташлап, шәһәр кочилирини айлинип намайиш қилған.

Намайиш сәвәбидин шенҗин лоңгаң районида йол тосулуп, қатнаш паләч һалға чүшүп қалған. Шенҗин шәһәрлик һөкүмәт зор түркүмдики сақчиларни әвәткән. Сақчилар билән ишчилар арисидики тиркишиштин кейин, ишчилар завутқа қайтуруп келингән. Әмма ишчиларниң қандақ шәрт билән завутқа қайтуруп келингәнлики һәққидә һазирчә ениқ мәлумат йоқ.

Түнүгүнки намайишқа қатнашқан ишчилардин бириниң билдүрүшичә, йеқинда тәйвәнлик хоҗайиндин йили аяқ завутини өткүзүвалған йеңи завут башлиқи уқтуруш чиқирип, ишчиларниң айлиқ иш һәққини әслидики 4500 сомдин 2500 сомға чүшүргәнликини елан қилған. Завут даирилири иш һәққиниң қачан әслигә келидиғанлиқи һәққидә ишчиларға ениқ җаваб бәрмәй, завутниң иқтисадий әһвали яхшиланғандин кейин, андин әһвалға қарап ишчиларниң иш һәққиниң өстүрүп берилидиғанлиқини уқтуруши, ишчиларни нарази қилғачқа дүшәнбә күнидики коллектип иш ташлаш вәқәси йүз бәргән.

Игилигән әһваллардин мәлум болушичә, шенҗиндики йили аяқ завути тәйвәнликләр мәбләғ салған завут болуп, йеқинқи бирқанчә йилдин буян үзлүксиз зиян тартишқа башлиған. Бу сәвәбтин завутниң әслидики 20 миң ишчиси қисқартилип, завутта 4000 ға йәтмәйдиған ишчи қалған икән.

Пикирләр (0)
Share
Толуқ бәт