Хитайниң гуйҗу, җяңши, фуҗйән өлкилиридә наразилиқ намайишлири йүз бәрди

Мухбиримиз меһрибан
2014-10-21
Елхәт
Пикир
Share
Принт

Йеқиндин буян хитай өлкә, шәһәрлиридә пуқраларниң наразилиқ һәрикәтлири барғанчә көпәйгән болуп, пәқәт 20-өктәбир дүшәнбә күни бир күн ичидила хитайниң бирқанчә өлкисидә йүз бәргән наразилиқ намайишлири сақчиларниң бастурушиға учриди.

Чәтәлләрдики хитай демократлириниң тор бекәтлиридин молихуа ториниң 21-өктәбирдики хевирдин мәлум болушичә, дүшәнбә күни гуйҗу, җяңши, фуҗйән, сәнши, хейлуңҗяң қатарлиқ өлкилиридә нәччә йүзлигән амминиң топлинип наразилиқ билдүрүш намайиши елип берилған болуп, бу йиғилишлар йәрлик даириләр тәрипидин бастурулған вә тонунуш йүз берип ярилиниш вәқәлири көрүлгәндин башқа намайиш башламчилири тутқун қилинған.

Хәвәрдә дейилишичә, гуйҗу өлкисиниң мәркизи гуйяңда йүз бәргән һөкүмәт даирилириниң йәр игилишигә қаршилиқ билдүрүш намайишиға қатнашқан нәччә йүзлигән пуқралар шәһәрлик һөкүмәт әвәткән 100 нәччә сақчи тәрипидин бастурушқа учрап 16 адәм тутқун қилинған. Фу җйәнниң шямен шәһиридә йүз бәргән 300 киши лозунка көтүрүп елип барған өй баһасиниң өсүп кетишигә наразилиқ билдүрүш намайишида 6 адәм тутқун қилинип, нәччә он адәм яриланған. Сәнши өлкисиниң бавҗи шәһиридә йүз бәргән өй ширкәтлиригә наразилиқ билдүрүш намайишида сақчилар намайишчиларға лаза сүйи чечип намайишчиларни тарқитивәткән вә башламчиларни қолға алған.

Пикирләр (0)
Share
Толуқ бәт