Xitaydiki sina, soxu we sumurgh qatarliq tor betliri taqiwétilgen

Muxbirimiz qutlan
2016.07.25

Birleshme agéntliqning xewirige qarighanda, béyjing da'iriliri xitaydiki birqanchilighan chong tiptiki tor betlirini “Sezgür témidiki siyasiy we ijtima'iy uchurlarni tarqatqan” dégen seweb bilen taqighan.

Igilinishiche, taqalghan chong tor betler ichide sina, soxu, sumurgh qatarliqlar bar bolup, ular xitayda nechche yüz milyon oqurmenliri bar bolghan shundaqla eng sezgür siyasiy témilarda uchur tarqitishqa jür'et qilghan ammiwi tor betliri iken.

Xitay hökümet organliri hazirgha qeder birleshme agéntliqning bu heqtiki so'allirigha héchqandaq inkas qayturmighan.

Xelq'ara taratqular bilen közetküchiler, xitay hökümitining yéqindin buyan ammiwi tor betlirige bolghan kontrolluqni heddidin artuq kücheytkenlikini ilgiri sürmekte.

Béyjingdiki melum uniwérsitétning axbarat fakultétidiki nam-sheripini ashkarilashni xalimaydighan bir proféssor bu heqte birleshme agéntliqining muxbirigha mundaq dégen: “Hazir weziyet shu qeder qiyinlashtiki, axbaratchiliq prinsipigha hörmet qilin'ghan, chongqur tekshürüsh we emeliy pakitlargha tayan'ghan herqandaq bir xewer yaki mulahizini yoruqluqqa chiqirish mumkinchiliki qalmidi.”

Melumki, xitaydiki axbarat qamilining eng roshen ipadiliri Uyghur éli we tibet qatarliq siyasiy jehettin eng sezgür bolghan chégra rayonlarda körülüwatqan bolup, radiyomiz téxi yéqinda Uyghur élidiki 5 neper tor bet sahibi bilen tor yazghuchilirining tutqun qilin'ghanliqini xewer qilghan idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.